جەتى سپورتشى كورەيادا جاسىرىنىپ قالىپ قويىپتى
بۇل جونىندە شەت ەلدىك باسىلىمدار جارىسا جار سالىپ جاتىر.
XVII جازعى ازيا ويىندارى اياقتالعانىمەن جەتى سپورتشى جانە ءبىر جۋرناليست ءوز ەلدەرىنە قايتپاي، ينچحوندا بوي تاسالاپ جۇرگەنگە ۇقسايدى. ماقساتتارى - وسى ەلدە جاسىرىنىپ قالىپ قويىپ، جۇمىس تاۋىپ الۋ.
انىعى، سپورتشىلاردىڭ ۇشەۋى نەپال، ەكەۋى شري-لانكا، ال قالعان ەكەۋى بانگلادەش پەن پالەستينا ازاماتتارى ەكەن. ولاردىڭ ۆيزالارىنىڭ مەرزىمى 19 - قازان كۇنى تۇگەسىلەتىن كورىنەدى.
ال ءبىر جۋرناليست پاكيستاننان كەلگەن ءتىلشى كورىنەدى. ونىڭ ۆيزاسىنىڭ مەرزىمى 30 - قازانعا دەيىن ەكەن. Sports.yahoo, Reuters سىندى شەتەلدىك باسىلىمدار تاراتقان اقپاراتتارعا سۇيەنسەك، ولار وڭتۇستىك كورەيادا قالىپ قويۋ ءۇشىن ءوز ەلدەرىنىڭ دەلەگاتسيالارى ساپىنان قاشىپ كەتكەنگە ۇقسايدى...
بالكىم، ينچحون دامۋشى ەلدەردىڭ سپورتشىلارى ءۇشىن جۇماققا تەڭ بولار. كوشەلەرى مۇنتازداي تازا، ساۋلەتتى قالا شىنىمەن دە تۇرمىستارى تومەن ەلدەردىڭ تۇرعىندارى ءۇشىن ۇناپ قالاتىنداي-اق. ءتىپتى وسى ەلدىڭ استاناسى سەۋلدەن تازا دەسەك تە بولادى. اسىرەسە، يوندجون ارالىنداعى ينچحون اۋەجايىن قالاعا قوسىپ تۇرعان، ۇزىندىعى 12,3 شاقىرىم (ەنى - 33,4 م) ۆانتا كوپىردىڭ ءوزى نەگە تۇرادى...
ايتپاقشى ("ايتىلماسا، ءسوز ولەدى" دەيدى قازەكەم) ... ۇلتاراقتاي جەرگە ءزارۋ كارىس حالقى ينچحون كوشەلەرىن دە، اۆتوكولىك جولدارىن دا كەڭەيتىپ سالعان. ال كەڭ-بايتاق جەرىمىز بار ءبىز اۆتوكولىك جولدارىن سالۋعا كەلگەندە "تارىلىپ" قالاتىندايمىز. انشەيىندەگى دارحاندىعىمىز قايدا؟
ءتىپتى، دالامىز ۇلان-عايىر ءبىزدىڭ ەلگە كوپ قاباتتى تۇرعىن ۇيلەردىڭ قاجەتى قانشا ەكەن دەپ تە ويلايسىڭ. نەگە بيزنەس جانە ساۋدا ورتالىقتارىن عانا كوپ قاباتتى عيماراتتار رەتىندە سالىپ، تۇرعىن ۇيلەردى ەكى-ءۇش قاباتتى كوتتەجدەر رەتىندە سالمايمىز...
اۆتور: نۇرعازى ساسايەۆ
