قازاقستاننىڭ دۇنيەجۇزىلىك ساۋدا ۇيىمىنا كىرەتىن كەزەڭى جاقىندادى

استانا. قازاقپارات - قازاقستاننىڭ دۇنيەجۇزىلىك ساۋدا ۇيىمىنا كىرۋ كەزەڭى جاقىنداپ قالدى. بۇل تۋرالى بۇگىن پارلامەنت سەناتىنىڭ جالپى وتىرىسىندا ق ر ۇلتتىق ەكونوميكا ءمينيسترى ەربولات دوسايەۆ مالىمدەدى.

ءمينيستردىڭ سوزىنە قاراعاندا، قازىرگى تاڭدا قازاقستان دۇنيەجۇزىلىك ساۋدا ۇيىمىنا كىرۋ بارىسىنداعى كەلىسسوزدەردىڭ سوڭعى ساتىسىن جۇرگىزىپ كەلەدى.

«كوپجاقتى جانە ەكىجاقتى كەلىسسوزدەر بەلسەندى ءجۇرىپ جاتىر. ەۋروپا وداعى جانە ا ق ش- قا بايلانىستى ەكى نەگىزگى ماسەلە بار بولاتىن. سونىڭ ىشىندە ەۋروپا وداعى بويىنشا ماسەلەلەر شەشىلدى دەپ ايتۋعا بولادى. جاقىن ارالىقتا ەكىجاقتى كەلىسىمگە قول قوياتىن بولامىز. سونىمەن قاتار، كوپجاقتى ماسەلەلەر بويىنشا، سونىڭ ىشىندە اۋىل شارۋاشىلىعىن قولداۋعا قاتىستى سۇراقتار دا ءبىرجاقتى ىڭعايلانىپ قالدى دەۋگە بولادى»، - دەدى دەپۋتاتتار سۇراعىنا جاۋاپ بەرگەن مينيستر دوسايەۆ.

 ونىڭ ايتۋىنشا، قازىرگى تاڭدا د س ۇ- عا قوسىلعان رەسەي تاراپىنان ورىن العان كەدەرگىلەر ەڭسەرىلگەن. «وسىعان وراي، اعىمداعى جىلدىڭ سوڭىنا دەيىن كەلىسسوزدەر بەلسەندى تۇردە جۇرگىزىلسە، سونىڭ ناتيجەسى بويىنشا قازاقستاننىڭ د س ۇ- عا ناقتى قاي ۋاقىتتا كىرەتىنى دە ايقىن بولادى»، - دەدى ەربولات دوسايەۆ.

اۆتور: قانات مامەتقازى ۇلى