قازاقستاندا ۇلتتىق تولەم جۇيەسى تەڭدەستىك تۇرعىدا جاسالاۋى ءتيىس - گ. يسين
ونىڭ ايتۋىنشا، ۇلتتىق تولەم جۇيەسىنىڭ باسقا حالىقارالىق تولەم جۇيەلەرىنەن شەتتەتىلىپ، وقشاۋلانۋى مەملەكەتكە ەشقانداي پايدا اكەلمەيدى.
«قازاقستاندا دەربەس ۇلتتىق تولەم جۇيەسىن جاساۋعا بىرنەشە رەت ارەكەت جاسالعانى ءمالىم. بۇل ماسەلەنىڭ كوتەرىلگەنىنە 10 جىلدان استى. بۇعان، ارينە، العىشارتتار جەتكىلىكتى. مەملەكەت ۇلتتىق مۇددەنى العا تارتىپ وتىر. بۇل تۇسىنىكتى. دەگەنمەن، ءبىزدىڭ بۇل سالاداعى تاجىريبەمىز مول. قازاقستاندىق ساراپشىلارمەن باسقا ەلدەردە وسى تەكتەس تولەم جۇيەلەرىن جۇزەگە اسىرۋعا قاتىستى تاجىريبەلەرىمىزبەن قاشاندا ءبولىسىپ كەلەمىز.
سوندىقتان، باسقا ەلدەردىڭ تاجىريبەسىنە سۇيەنىپ ايتار بولساق، دەربەس ۇلتتىق تولەم جۇيەسىن باسقا تولەم جۇيەلەرىنەن بولەكتەپ، وقشاۋ جاعدايدا دامىتۋ ەشقانداي پايدا اكەلمەيدى. بۇل سالادا مونوپولياعا جول بەرۋگە بولمايدى. بۇل تولەم نارىعىندا باسقا دا بانكتەرگە وزدەرىنىڭ يننوۆاتسيالىق ونىمدەرىن اكەلۋگە مۇمكىندىك بەرىلگەنى ءجون. ياعني، باسەكەلەستىك بولۋى كەرەك. سوندا ۇلتتىق تولەم جۇيەسىنىڭ بولاشاعىنا سەنۋگە بولادى. ءبىز قازىر بۇل ماسەلە بويىنشا ۇلتتىق بانكپەن ديالوگ جۇرگىزىپ جاتىرمىز. قالاي بولعاندا دا بيلىكپەن دە بانكتەرمەن دە ىنتىماقتاسۋعا دايىنبىز»، - دەدى گەنيات يسين.
اۆتور: جاپپاربەرگەن ايبوتا
