ماجىلىسمەندەر ءباس تىگۋ مەكەمەلەرىن قىزعىشتاي قورعاپ شىقتى

استانا. قازاقپارات - بۇگىن بۋكمەكەرلىك كەڭسەلەرگە قاتىستى زاڭ جوباسىن تالقىلاعان دەپۋتاتتار فراكسيالارى بويىنشا ەكىگە ءبولىنىپ، قىزىلكەڭىردەك بولىپ تالاستى.

ەۋرازيالىق ەكونوميكالىق وداق تۋرالى شارتتى راتيفيكاتسيالاۋ كەزىندە قىڭق دەمەگەن ماجىلىسمەندەر ءتىپتى، ءباس تىگۋ مەكەمەلەرىن قىزعىشتاي قورعاپ شىقتى.

ءبىر ءبىرىن سوزبەن تۇيرەگەن دەپۋتاتتار داۋى تەك فراكسيانىڭ جەتەكشىلەرى ارالاسقاننان كەيىن عانا توقتادى. پارلامەنت ۇيىنەن باقىتنۇر ءالىباي تارقاتادى.

ۇلتتىق ەكونوميكا ءمينيسترى سالىق ماسەلەسى جايلى زاڭ جوباسىن تانىستىردى. از عانا تالقىلاۋ بولىپ، قارسىلىقسىز ماقۇلداندى. قىتاي ۇكىمەتىنىڭ ديپلوماتيالىق وكىلدىكتەرىنىڭ عيماراتتارىنا جەر ءبولۋ ماسەلەسى دە ءۇنسىز قابىلدانىپ كەتتى. ءبارى مادەنيەت جانە سپورت ۆيتسە-ءمينيسترىنىڭ بايانداماسىنان باستالدى. تاستانبەك ەسەنتايەۆ تۇرعىن ۇيلەردىڭ استىنا بۋكمەكەرلىك كەڭسەلەردىڭ ورنالاسۋىنا تىيىم سالامىن دەگەنىمەن قويماي، سالىقتى كوتەرەمىز دەگەن وزگەرىستى ۇسىندى.

تاستانبەك ەسەنتايەۆ، ق ر مادەنيەت جانە سپورت ءمينيسترىنىڭ ورىنباسارى:

ال سونىڭ ىشىندەگى ەلەكتروندىق كاسسالاردىڭ 125 تەن 2000 عا دەيىن. بۇگىنگى تاڭدا بۋكمەكەرلىك كاسسالار 2 مىڭعا جۋىق. ونىڭ 700 ى عانا ءبىزدىڭ سالامىزدا تىركەلگەن. قالعاندارى زاڭسىز ىستەپ وتىر.

زاڭسىز جۇمىس ىستەپ، سالىقتان جالتارعاندارعا سالىناتىن ايىپپۇل دا بىرنەشە ەسەگە وسكەن. بۇل - كازينو مەن ەلەكتروندىق ويىنحانالاردان كەيىنگى قوعامدىق ىندەتتى جويۋعا باعىتتالعان نىق قادام سياقتى كورىنگەنى راس. الايدا، وزدەرىن وپپوزيتسيا سانايتىن كوممۋنيستەر مۇنى بيزنەسكە قارسى جاسالعان ارەكەت دەپ قيعىلىق سالدى.

ارىپتەسىنىڭ ءباس تىگەتىن مەكەمەلەردى قورعاشتاۋىنا شىداي الماعان "نۇر وتاندىق" راۋان شاەكين قىزدى-قىزدىمەن، بۋكمەكەرلىك كەڭسەلەردى مۇلدەم قالا اۋماقتارىنان الاستاتۋ كەرەك دەپ شىقتى. ال وزگە كوممۋنيستەر ءوز پارتيالاستارىن جاقتاپ، قىزۋ تالقىلاۋ باستالعالى جاتقان بولاتىن. وسى جەردە اڭگىمەنىڭ اڭىسىن اڭدىعان فراكسيا ءتوراعالارى ارالاسىپ، وزەۋرەگەن قوس تاراپتىڭ جەلىگىن باستى.

پارتيا ىشىنە جىك سالىپ، ۇيىپ وتىرعان ءماجىلىس ۇيىمىنا ىرىتكى سالا جازدادى دەلىنگەن تۇرسىنبەك ءومىرزاقوۆ بۇل پىكىرمەن كەلىسپەي وتىر. ول فراكسيا اتىنان ەمەس، جەكە دەپۋتات رەتىندە ءوز ويىمدى ايتتىم دەپ اقتالادى. الدىن الا كەلىسىلمەگەن بەلسەندىلىگى ءۇشىن جازالانبايسىز با دەگەندە كۇمىلجىپ بارىپ جاۋاپ بەردى.

دەپۋتات ءتىپتى امەريكانىڭ لاس-ۆەگاس قالاسىندا ءبىر رەت ويىنحاناعا كىرىپ، ءباس تىككەنىن دە جاسىرمادى. تۇرسىنبەك ءومىرزاقوۆ ءتىپتى تۋعان بالاسىنىڭ بۋكمەكەرلىك كەڭسەلەرگە بارعانىنا قارسى ەمەستىگىن دە اشىق ايتتى.

باقىتنۇر ءالىباي، ءتىلشى:

وسىلايشا، ماجىلىسمەندەر بۋكمەكەرلىك كەڭسەلەردىڭ كولەڭكەلى بيزنەسىن جولعا قويۋعا باعىتتالعان زاڭ جوباسىن ناقتى تالقىلاۋدىڭ ورنىنا، قاي پارتيانىڭ مىسى باسىم ەكەنىن كورسەتۋگە تىرىستى. ءبىراق، دەپۋتاتتار سوڭىندا قۇجاتتى ءبىرىنشى وقىلىمدا ماقۇلداپ جىبەردى. ازىرگە ەكىنشى وقىلىمعا دەيىن تىرەسكەن قوس فراكسيانىڭ قانداي مامىلەگە كەلەتىنى قىزىق بولىپ وتىر.

باقىتنۇر ءالىباي، سانات يمانعاليەۆ.

31.kz