ەندى شەنەۋنىكتەر مەملەكەتتىك باسپانالاردى جەكەشەلەندىرە المايدى

استانا. قازاقپارات - وسى كۇنى كوپتەگەن شەنەۋنىك جۇمىس بابىمەن وڭىرلەرگە اۋىسىپ، مەملەكەتتىك تۇرعىن ءۇي قورىنان باسپانا الادى.

«ءبىراق ءبارىن جەكەشەلەندىرىپ، ەلدىمەكەندەگى نەمەسە قالاداعى ميسسياسى بىتكەننەن كەيىن باسپانانى ساتىپ كەتەدى»، - دەيدى ءماجىلىس دەپۋتاتى سەرىكباي نۇرعيسايەۆ.

ال «تۇرعىن ءۇي قاتىناستارى» تۋرالى زاڭ جوباسىنا ەنگىزىلىپ وتىرعان بۇگىنگى تولىقتىرۋلار مۇنداي ولقىلىقتارعا جول بەرمەيدى.

سەرىكباي نۇرعيسايەۆ، ق ر پارلامەنتى ءماجىلىسىنىڭ دەپۋتاتى:

- ءۇي الادى، ءۇي العاننان كەيىن سونى جەكەشەلەپ، ساتىپ كەتەدى. ول جاقتاردا ۇيلەردىڭ سالىنۋى دا وتە از بولىپ جاتىر. سوندىقتان كەزەكتە تۇرعان ادامدار بالەنشە جىل الا الماي جاتادى. ەندى سول جەكەشەلەندىرۋدى ادام بالاسى ومىرىندە ءبىراق رەت جەكەشەلەندىرۋگە بولادى. مىسالى، اۋىلدا جەكەشەلەندىردى مە، قالاعا كوشىپ كەلسەڭ دە، استاناعا كوشىپ كەلسەڭ دە، جەكەشەلەندىرۋگە بارا المايسىڭ. ساتىپ الۋىڭ كەرەك.

سونىمەن قاتار مەملەكەتتىك قىزمەتكەرلەرگە ءۇي بەرۋ بارىسىن باقىلاۋ، ول پروتسەسستىڭ اشىق بولۋى، ايماقتاردا سالىناتىن بيۋدجەتتىك قۇرىلىستىڭ ساپاسىن قاداعالاۋ سىندى ءبىرقاتار تولىقتىرۋ ەنگىزىلدى. بۇعان قوسا، بۇگىن تومەنگى پالاتا دەپۋتاتتارى سالىق كودەكسىنە ەنگىزىلگەن وزگەرتۋلەردى ءبىرىنشى وقىلىمدا ماقۇلدادى.

زاڭ جوباسىن ۇلتتىق ەكونوميكا ءمينيسترى تانىستىردى. ەربولات دوسايەۆتىڭ ايتۋىنشا، قۇجات كاسىپكەرلىك ءۇشىن ءتيىمدى ورتا قالىپتاستىرىپ، وتاندىق بيزنەستى دامىتۋعا جاڭا مۇمكىندىكتەر بەرەدى. سونداي-اق، سالىق تولەۋشىلەرگە سالىنعان ايىپپۇلدار مەن ءوسىماقىلاردى الىپ تاستاۋ، ياعني سالىقتىق راقىمشىلىق جاساۋ جوسپارلانىپ وتىرعانى دا ايتىلدى. جالپى العاندا بۇل سومما 190 ميلليارد تەڭگەدەن اسىپ جىعىلادى.

ەربولات دوسايەۆ، ق ر ۇلتتىق ەكونوميكا ءمينيسترى:

- ۇسىنىلعان سالىقتىق امنيستيانى جۇرگىزۋ سالىق تولەۋشىلەرگە بوساتىلعان قاراجاتتى بيزنەستى دامىتۋعا جانە كەڭەيتۋگە جۇمساۋعا مۇمكىندىك بەرەدى. جانە دە وسىلايشا ىشكى ينۆەستيتسيالاردىڭ الەۋەتىن كۇشەيتەدى.

دەپۋتاتتار بۇدان بولەك ويىن بيزنەسىنە قاتىستى زاڭعا ەنگىزىلگەن تولىقتىرۋلاردى دا تالقىلادى. ونىڭ ىشىندە ەلىمىزدە ينتەرنەت-كازينولاردىڭ جۇمىسىنا تىيىم سالۋ كوزدەلىپ وتىر. سونداي-اق ويىن بيزنەسىن جۇرگىزۋگە رۇقسات بەرۋدىڭ تالابىن دا كۇشەيتۋ ماقسات ەتىلگەن. زاڭ جوباسىندا بۇل كاسىپتىڭ سالىعىن كوبەيتۋ قاراستىرىلعان.

تاستانبەك ەسەنتايەۆ، ق ر مادەنيەت جانە سپورت ۆيتسە-ءمينيسترى:

- بۋكمەكەرلىك كاسسالاردا 75 تەن 150 ايلىق ەسەپتىك كورسەتكىشكە دەيىن كوتەرىپ وتىرمىز. بۇگىنگى كەزدە بۋكمەكەرلىك كاسسالار 2 مىڭعا جۋىق. ونىڭ 700 ى عانا ءبىزدىڭ سالادا تىركەلگەن. ال قالعاندارى زاڭسىز ىستەۋدە. سوندىقتان ءبىز بۇلارعا دا تىيىم سالۋدى قاراستىرىپ، بۇگىنگى زاڭنىڭ ىشىندە، جوسپاردىڭ ىشىندە ول دا قاراستىرىلعان.

 

دەپۋتاتتاردىڭ ءبارى دەرلىك زاڭ جوباسىنا قولداۋ بىردىرسە، تۇرسىنبەك ءومىرزاقوۆ ويىن بيزنەسىنە توسقاۋىل قويۋ ەل ەكونوميكاسىن دامىتۋعا كەرى اسەرىن تيگىزۋى مۇمكىن دەگەن پىكىردە.

تۇرسىنبەك ءومىرزاقوۆ، ق ر پارلامەنتى ءماجىلىسىنىڭ دەپۋتاتى:

- ءبىز ەلەكتروندى كازينولاردى سىرتقا شىعارىپ، ونى جاۋىپ تاستاساق، ءبىز رەسەي سياقتى 40 پروتسەنت كىرىسىمىزدەن ايىرىلامىز. ءبىز ولاردى جاپپاۋىمىز كەرەك.

دەگەنمەن كوپشىلىكتىڭ پىكىرىنشە، ويىن بيزنەسى قوعامدى ازدىرادى. سوندىقتان دەپۋتاتتار زاڭ جوباسىن ءبىرىنشى وقىلىمدا ماقۇلدادى.

ءتىلشى: دوستىق تالعات ۇلى

وپەراتور: جاسۇلان شاكەنوۆ

khabar.kz