قولما-قول اقشا قاي ەلدىڭ بولماسىن، ەكونوميكاسىنا قيىندىق تۋدىرادى - ا. دۋنايەۆ

الماتى. قازاقپارات - قولما-قول اقشا بۇگىنگى تاڭدا قاي ەل بولماسىن، ەكونوميكاسىنا ۇلكەن قيىندىق تۋدىرىپ وتىر.

بۇل تۋرالى بۇگىن الماتىدا قازاقستاندا تۇڭعىش رەت «كەشبەك» قىزمەتى بار نەسيەلىك كارتانىڭ شىعارىلۋىنا بايلانىستى وتكەن باسپا ءسوز ءماسليحاتىندا MasterCard بۇقارالىق كومپانياسىنىڭ باسقارۋشى ديرەكتورى الەكساندر دۋنايەۆ مالىمدەدى.

ونىڭ ايتۋىنشا، ەكونوميكا قارىشتاپ دامىعان سايىن، حالىقتىڭ ءال-اۋقاتى ارتقان سايىن، ورتالىق بانكتەر قولما-قول اقشانى كوپتەپ شىعارۋعا ءماجبۇر بولادى. ءبىراق، ەكونوميكا ءۇشىن دە، مەملەكەت ءۇشىن دە بۇل ۇلكەن ىڭعايسىزدىق تۋعىزادى.

«بۇگىنگى تاڭدا الەمدە تولەم تەحنولوگياسى نارىعى جاڭا كەزەڭ الدىندا تۇر. بۇل جاڭا باعىت. ءقازىر قانشاما جاڭا يننوۆاتسيالىق كارتوچكالىق ونىمدەر شىعارىلىپ جاتىر. اسىرەسە، ۇيالى تەلەفون ارقىلى قولما-قول اقشاسىز تولەم جاساۋدىڭ جاڭا جولدارى شىعۋدا. بۇل ارينە ادامدار ءۇشىن وتە ىڭعايلى. سوندىقتان، جاقىن بولاشاقتا تولەم يندۋسترياسىندا عالامدىق دەڭگەيدە ماڭىزدى، ساپالى قادام جاسالادى» - دەدى ءوز سوزىندە ا. دۋنايەۆ.

ول سونىمەن قاتار، قازاقستاندا تۇڭعىش رەت ەۋرازيالىق بانكپەن بىرلەسە شىعارىلعان جاڭا كارتوچكانىڭ بولاشاعى زور ەكەندىگىن العا تارتتى.

«PayPass» يننوۆاتسيالىق تەحنولوگياسىمەن جابدىقتالعان كارتوچكا قازاقستانعا دا جەتتى. ونى ەندى بوتەن قولعا بەرمەي-اق، تەرمينالدان وتكىزبەي-اق، تولەم جاساي بەرۋگە بولادى. قالاي؟ كارتوچكانى ارنايى تەرمينالعا ءوزىڭىز جاقىنداتساڭىز نەمەسە ءجاي عانا جاناستىرساڭىز جەتىپ جاتىر. وندا بىرەگەي چيپ ورناتىلعان. بۇل كليەنتتىڭ ۋاقىتىن دا، اقشاسىن دا ۇنەمدەيدى ءارى ىڭعايلى. «PayPass» تەحنولوگياسى 2000 - جىلدىڭ باسىندا قولعا الىنعان بولاتىن. سودان بەرى كارتوچكامەن عانا ەمەس، چيپ سالىنعان كەز كەلگەن زاتپەن: تەلەفونمەن، ساعاتپەن جانە باسقا زاتتارمەن تولەم جاساۋعا قول جەتكىزىلدى» - دەدى ا. دۋنايەۆ.

ءوز كەزەگىندە ەۋرازيالىق بانكتىڭ باسقارما ءتوراعاسى مايكل ەگلتون قازاقستاندا بانك كليەتتەرىنە ەندى كارتوچكا ارقىلى بونۋستار مەن باللدار ەمەس، «ناقتى» اقشا ءتۇسىپ تۇراتىندىعىن ءمالىم ەتتى.

«بۇل كارتوچكا ارقىلى ءتيىستى ساۋدا ورىندارىندا قولما-قول اقشاسىز تولەم جاسالعاندا، تاۋارعا تولەنگەن اقشانىڭ 10 پايىزعا جۋىعى سول مەزەتتە كارتوچكاعا قايتا ءتۇسىپ وتىرادى. ونىڭ كولەمى وپەراتسيا مەن كارتوچكانىڭ تۇرىنە بايلانىستى» - دەدى م. ەگلتون.

اۆتور: جاپپاربەرگەن ايبوتا