اتا-انانىڭ بالاسىنا جاساعان دۇعاسى قابىل بولادى - باس ءمۇفتي

الماتى. قازاقپارات - بۇگىن قازاقستان مۇسىلماندارى ءدىني باسقارماسىنىڭ ءتوراعاسى ەرجان قاجى مالعاجى ۇلى «بالبۇلاق» رەسپۋبليكالىق بالالاردى وڭالتۋ ورتالىعىندا بولدى.

بۇل تۋرالى ق م د ب باسپا ءسوز قىزمەتى حابارلادى.

باس ءمۇفتي ورتالىق جۇمىسىمەن تانىسىپ، بۇلدىرشىندەرگە ارنايى سىيلىقتار ۇلەستىردى.

«ادام جاقسىلىققا ۇمتىلسا، ماقساتىنا جەتەدى. پايعامبارىمىز (س. ع. س. ) حاديسىندە: «كىم نەنى نيەت ەتسە، سوعان جەتەدى»، - دەگەن. اۋرۋدى جاراتقان اللا شيپاسىن دا بەرەدى.

بۇل ورتالىقتان ەلىمىزدىڭ يگىلىگى ءۇشىن قىزمەت ەتەتىن اسىل ازاماتتار مەن ازاماتشالار شىعاتىنىنا سەنىمدىمىن. دۇعا - مۇسىلماننىڭ قورعانى. اتا-انانىڭ بالاسىنا جاساعان دۇعاسى قابىل بولادى»، - دەدى ەرجان قاجى مالعاجى ۇلى.

ەرجان قاجى مالعاجى ۇلى ءدىني باسقارما تاراپىنان «بالبۇلاق» رەسپۋبليكالىق بالالاردى وڭالتۋ ورتالىعىندا قايىرىمدىلىق شارالار ءجيى وتكىزىلىپ تۇراتىنىن اتاپ ءوتتى.

قازىر بۇل ورتالىقتا ەلىمىزدىڭ ءار ايماعىنان كەلگەن جۇيكە جۇيەسى مەن پسيحيكاسى زاقىمدانعان 100 گە جۋىق ءبۇلدىرشىن ەمدەلۋدە.

سونىمەن قاتار، بۇگىن الماتى قالاسى ورتالىق مەشىتىنىڭ باس يمامى نۇربەك قاجى اۋەزحان ۇلى الماتى قالالىق مۇمكىندىگى شەكتەۋلى بالالارعا ارنالعان وڭالتۋ ورتالىعىندا قايىرىمدىلىق شاراسىن وتكىزدى. باس يمامنىڭ باستاماسىمەن بولاشاقتا وسى ورتالىقتا سەنبىلىكتەر، يگى شارالار، قايىرىمدىلىق اكسيالار تۇراقتى تۇردە وتكىزىلىپ تۇرماق.

اۆتور: گۇلميرا عوسمانالي