ولجاس سۇلەيمەنوۆ: «تۇركى مادەنيەتى مەن قورقىت اتا» اتتى تۋىندىم جۋىردا جارىققا شىعادى

قىزىلوردا. قازاقپارات - جازۋشى، قوعام قايراتكەرى ولجاس سۇلەيمەنوۆ قىزىلوردادا ءوتىپ جاتقان «قورقىت اتا مۇرالارى - تۇركى حالىقتارىنىڭ رۋحاني قازىناسى» اتتى حالىقارالىق عىلىمي-تەوريالىق كونفەرەنسيادا تۇركى مادەنيەتى مەن قورقىت اتا تۋرالى كىتاپ شىعاراتىندىعىن ءمالىم ەتتى.

قىزىلوردا وبلىسى اكىمدىگى مەن حالىقارالىق «تۇركسوي» ۇيىمى بىرلەسىپ ۇيىمداستىرىپ وتىرعان فەستيۆال اياسىندا بۇگىن حالىقارالىق عىلىمي-تەوريالىق كونفەرەنسيا باستالدى. القالى جيىنعا 9 مەملەكەتتەن 29 ايگىلى عالىمدار، فولكلورتانۋشىلار، ونەر زەرتتەۋشىلەرى قاتىسىپ جاتىر.

كونفەرەنسيانىڭ اشىلۋىندا ءسوز سويلەگەن وبلىس اكىمى قىرىمبەك كوشەربايەۆ تاريح تاعىلىمىن قاستەرلەپ، قورقىت اتا مۇراسىن تۇركى الەمىنە كىرەتىن ءاربىر ۇلتتىڭ ورتاق قۇندىلىعىنا اينالدىرۋدى ماقسات تۇتقان سىر ەلىندەگى عىلىمي باسقوسۋدى ماڭىزدى وقيعا دەپ اتاپ ءوتتى. قورقىت بابامىزدىڭ رۋحاني قازىناسىن ناسيحاتتاۋعا ارنالعان عىلىمي-تەوريالىق كونفەرەنسيا بارىسىندا تۇركىتىلدەس ەلدەر مادەنيەتىنىڭ بىرلىگى مەن تۇتاستىعى تۋرالى وزەكتى ماسەلەلەر قوزعالىپ، قورقىتتىڭ تاريحي تۇلعاسى مەن اسىل مۇراسى جايىندا عىلىمي باياندامالار وقىلدى. عالىمدار تاراپىنان «قورقىت» ەنسيكلوپەدياسىن جانە حالىقارالىق دەڭگەيدە «قورقىت» جۋرنالىن شىعارۋ، سونىمەن قاتار قورقىت تۋرالى كوركەم فيلم، پەسا، مۋزىكالىق شىعارما جازۋ جونىندە ۇسىنىستار جاسالدى. سونداي-اق، قازاقستاننىڭ حالىق جازۋشىسى ولجاس سۇلەيمەنوۆ «تۇركى مادەنيەتى مەن قورقىت اتا» جايلى ەڭبەك جازىپ جاتقاندىعىن جانە كوپ ۇزاماي جارىققا شىعاتىندىعىن جەتكىزدى.

ەسكە سالا كەتسەك، بۇگىن تۇركى تىلدەس حالىقتاردىڭ «قورقىت جانە ۇلى دالا سازى» اتتى ءداستۇرلى حالىقارالىق مۋزىكالىق ونەر فەستيۆالى اياسىندا «تۇران جانە تۇركى الەمى» اتتى سىر ەلى قولونەر شەبەرلەرىنىڭ ەتنو-ارحەولوگيالىق كورمەسى مەن حالىقارالىق عىلىمي-تەوريالىق كونفەرەنسيا جانە وزگە دە مادەني ءىس-شارالار ۇيىمداستىرىلادى.

اۆتور: ەلۋباي اۋەزوۆ