نۇرماحان، جانىبەك باتىرلاردىڭ ەڭبەگى ەلەندى
كەشە الماتى وبلىسى بوكس جانە كۇرەس فەدەراتسياسىنىڭ پرەزيدەنتى باۋىرجان وسپانوۆ جەتىسۋ ءوڭىرىنىڭ قوس جۇلدىزى، كۇنى كەشە عانا وڭتۇستىك كورەيانىڭ ينچحون قالاسىندا اياقتالعان XVII جازعى ازيا ويىندارىنىڭ جەڭىمپازى اتانعان جانىبەك ءالىمحان ۇلى مەن نۇرماحان تىناليەۆتى ماراپاتتادى.
- سىزدەردىڭ بۇل جەڭىستەرىڭىز ەل سپورتى تاريحىندا التىن ارىپتەرمەن جازىلىپ قالارى انىق، - دەپ باستادى ءوز ءسوزىن باۋىرجان كەڭەسبەك ۇلى. - جارقىن جەڭىستەرىڭىز قۇتتى بولسىن! ينچحونداعى جارىس بارىسىندا جانىبەك پەن نۇرماحان جانكەشتىلىك تانىتىپ، جەڭىس تۇعىرىنىڭ ەڭ بيىك ساتىسىنا كوتەرىلدى. ارينە، ونداي ەڭبەك ەسكەرۋسىز قالماۋعا ءتيىس. سول سەبەپتى دە بۇگىن بارلىقتارىڭىزدىڭ باستارىڭىزدى قوسىپ، وبلىستىق فەدەراتسيا اتىنان وزىندىك سىي-سياپات جاساۋدى ءجون كوردىم.
قۇتتىقتاۋ سوزدەن كەيىن بوكسشى جانىبەك ءالىمحان ۇلى مەن گرەك-ريم كۇرەسى شەبەرى نۇرماحان تىناليەۆ 10 مىڭ ا ق ش دوللارى كولەمىندە سىياقىعا يە بولدى. سونداي-اق ولاردىڭ جەكە باپكەرلەرى دە قۇرالاقان قالعان جوق. مۇرات سيقىمبايەۆ پەن گەورگي سۋرتسۋمياعا 5 مىڭ دوللاردان تابىس ەتىلدى.
وسى جيىنعا قاتىسقان ماسكەۋ وليمپياداسىنىڭ چەمپيونى جاقسىلىق ۇشكەمپىروۆ، بەيجىڭ وليمپياداسىنىڭ قولا جۇلدەگەرى نۇرباقىت تەڭىزبايەۆ، بىلىكتى باپكەرلەر تۇرسىنعالي ەدىلوۆ، تۇراربەك وماروۆ جانە التاي تانابايەۆ جانە تاعى باسقا ماماندار سپورتشىلارعا اركەز قامقورلىق كورسەتىپ جۇرگەن وسپانوۆ مىرزاعا ءوز ريزاشىلىقتارىن ءبىلدىرىپ، ازيا ويىندارىندا توپ جارعان جىگىتتەرگە جاڭا تابىستار تىلەدى.
- مەنىڭ الماتى وبلىسى بوكس فەدەراتسياسىن باسقارعانىما بەس جىلدان استى. سول كەزدەرى جەتىسۋ ءوڭىرىنىڭ بىردە-ءبىر بىلعارى قولعاپ شەبەرى قازاقستاننىڭ ۇلتتىق قۇراماسى ساپىندا جوق ەدى. ەل بىرىنشىلىگىندە جۇلدەگەرلەر ساناتىنان بىردە-ءبىر جەرلەسىمدى كورە الماي، كوڭىلىمدى كىربىڭ شالعان. سودان قاۋىرت جۇمىس باستالدى. جەرگىلىكتى باپكەرلەرمەن بىرگە وتىرىپ، ءبىراز شارۋا تىندىردىق. بۇگىنگى تاڭدا ءبىزدىڭ بوكسشىلار رەسپۋبليكامىزدا الدىڭعى قاتاردا. بيىلعى جىلدىڭ بەل ورتاسىندا وبلىستىق كۇرەس فەدەراتسياسىنىڭ تىزگىنىن ۇستادىم. شىنى كەرەك، اقساپ تۇرعان تۇستارىمىز كوپ. ءبىز ءوز الەۋەتىمىزدى تولىقتاي پايدالانا الماي كەلەمىز. سونى قالپىنا كەلتىرۋ ءۇشىن تىنباي ەڭبەك ەتۋىمىز كەرەك. جەتىسۋ ءوڭىرىنىڭ جەڭىسپەن ورىلگەن بالۋاندىق ءداستۇرىن قايتا جاڭعىرۋ ءبىزدىڭ پارىزىمىز، - دەيدى ب. وسپانوۆ مىرزا.
ماراپاتتاۋ ءراسىمى اياقتالعاننان سوڭ وسى سپورت تۇرلەرىنىڭ بۇگىنى جانە كەلەشەگى جايىندا كەڭىنەن اڭگىمە قوزعالدى. الما-كەزەك ءسوز العان باپكەرلەر العا قويعان جوسپارلارىمەن ءبولىسىپ، شەشىلمەي جاتقان پروبلەمالاردى تىلگە تيەك ەتتى. ءوز كەزەگىندە فەدەراتسيا باسشىسى جوعارىداعى ماسەلەلەردىڭ شەشىلۋىنە بارىنشا سەپتىگىن تيگىزەتىنىن ايتىپ، ءوز قاراماعىنداعى قىزمەتكەرلەرگە ناقتى تاپسىرمالار بەردى.
دايىنداعان عالىم سۇلەيمەن
«ايقىن»
