مينيسترلىك ۇيىمداستىرعان تەرمە بايقاۋىنا «ازىرەت سۇلتان» مەشىتى وتكىزگەن بايقاۋ جەڭىمپازدارىنىڭ قاتىسۋعا تىيىم سالىپ وتىر
مەملەكەت باسشىسى نۇرسۇلتان نازاربايەۆتىڭ 2011 - جىلدىڭ 29 - ماۋسىمىنداعى «ق ر تىلدەردى دامىتۋ مەن قولدانۋدىڭ 2011-2020 - جىلدارعا ارنالعان مەملەكەتتىك باعدارلاماسىن» جۇزەگە اسىرۋعا ارنالعان بۇل بايقاۋ ەلىمىزدە العاش رەت وتكەلى وتىر. وسىعان وراي بۇگىن استانادا فيلوسوپيا عىلىمدارىنىڭ دوكتورى، پروفەسسور عاريفوللا ەسىم، فيلوسوپيا عىلىمدارىنىڭ دوكتورى پروفەسسور سەرىك نەگيموۆ، تەرمەشى ەلمۇرا جاڭابەرگەنوۆا جانە ق ر مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق - ساياسي جۇمىس كوميتەتى ءتوراعاسىنىڭ ورىنباسارى سەرىك سالەموۆ ارنايى باسپا ءسوز ءماسليحاتىن وتكىزدى.
باسپا ءسوز ءماسليحاتىندا ءمالىم بولعانداي، بايقاۋعا استانا مەن الماتى جانە وبلىستاردان بارلىعى 32 تەرمەشى قاتىسپاق. بايقاۋ شارتىندا كورسەتىلگەندەي، قاتىسۋشىلار جاڭا تەرمەلەرىن ۇسىنۋى كەرەك. ءبىراق جوعارىدا اتالعان 32 قاتىسۋشىنىڭ قاتارىنا «ازىرەت سۇلتان» مەشىتى 2013 -جىلى ۇيىمداستىرعان بايقاۋدىڭ جەڭىمپازدارى قاتىستىرىلمايدى.
بۇل تۋرالى بايقاۋ ەرەجەسىندە كورسەتىلگەن. ق ر مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق - ساياسي جۇمىس كوميتەتى ءتوراعاسىنىڭ ورىنباسارى سەرىك سالەموۆ تە «ازىرەت سۇلتان» مەشىتى ۇيىمداستىرعان بايقاۋ جەڭىمپازدارىنىڭ بۇل بايقاۋعا قاتىسا المايتىنىن اتاپ ءوتتى.
«بىلتىر «ازىرەت سۇلتان» مەشىتىنىڭ ۇيىمداستىرۋىمەن تۋرا وسى تاقىرىپتا تەرمە بايقاۋى ءوتتى. ونىڭ جەڭىمپازىنىڭ وسى بايقاۋعا قاتىسۋىنا شەكتەۋ قويىپ وتىرمىز. ونىڭ سەبەبى، ءبىز بايقاۋ ەرەجەسىن جاسايتىن كەزدە ەكى-ءۇش ادام وتىرىپ جاساعان جوقپىز. ءبىز باسقا دا سايىستاردىڭ انالوگتارىن قارادىق. ارنايى ساراپشىلار مەن زاڭگەرلەرمەن بىرىگە وتىرىپ وسى ەرەجەنى جازدىق. ەرەجەدە وسىنداي تالاپ بار. ونداي تالاپقا زاڭدى تۇرعىدا شەكتەۋ جوق»، - دەدى س. سالەموۆ.
ءبىراق، كوميتەت ءتوراعاسىنىڭ ورىنباسارى جۋرناليستەردىڭ «مەشىت پەن مينيسترلىك ۇيىمداستىرعان تەرمە ەكەۋى ەكى ءتۇرلى دۇنيە. بىرەۋىندە يماندىلىق، ەندى بىرىندە ءتىل ماسەلەسى ايتىلماق. نەگە وسى ەسكەرىلمەگەن؟» دەگەن سۇراعىنا: «ءبىزدىڭ مينيسترلىك ۇيىمداستىراتىن بايقاۋ جەڭىمپازدارى كەلەسى بايقاۋعا جىبەرىلمەيدى. تالاپ سولاي»، - دەپ جاۋاپ بەردى.
ءتوراعا ورىنباسارىنىڭ جاۋابىنا قاناعاتتانباعان جۋرناليستەر «مەشىت وتكىزگەن سايىستىڭ مينيسترلىككە قاتىسى قانشالىقتى؟» دەپ قايتا سۇرادى.
«ءبىز جەڭىمپازداردىڭ ارتىندا كەلە جاتقان جاستارعا ورىن بولعانىن قالايمىز. سوندىقتان قاتىستىرىلمايدى»، - دەدى س. سالەموۆ.
باسپا ءسوز ءماسليحاتىنا قاتىسقان ف. ع. د، پروفەسسور عاريفوللا ەسىم بايقاۋ ەرەجەسىندە مەشىتتى انىق كورسەتكەن دۇرىس ەمەس دەپ سانايتىندىعىن جەتكىزدى.
«مەشىت دەگەن قاسيەتتى ءسوزدى بايقاۋ ەرەجەسىنە قوسپاۋ كەرەك ەدى. ودان دا «رەسپۋبليكالىق بايقاۋلار جەڭىمپازدارى قاتىسا المايدى» دەپ جازعان ءجون ەدى»، - دەدى ع. ەسىم.
باسپا ءسوز ءماسليحاتىنىڭ سوڭىندا جۋرناليستەردىڭ سىن-ەسكەرتپەلەرىن تىڭداعان ق ر مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق - ساياسي جۇمىس كوميتەتى ءتوراعاسىنىڭ ورىنباسارى سەرىك سالەموۆ بايقاۋ ەرەجەسىن قايتا قارايتىندىعىن جەتكىزدى.
ايتا وتەيىك، الداعى 7 - قاراشادا استانادا «تەكتى ءسوزدىڭ تورەسى - تەرمە» اتتى بايقاۋ وتپەك. قاتىسۋشىلار ۇلتتىق قۇندىلىقتاردى ناسيحاتتايتىن 7 ءتۇرلى باعىتتا باقتارىن سىنايتىن بولادى. بايقاۋ جەڭىمپازىنا اۆتوكولىك، ءى ورىنعا 1 ميلليون، Ⅱ ورىنعا 750 مىڭ تەڭگە، Ⅲ ورىنعا 500 مىڭ تەڭگە كولەمىندە جۇلدە بەرىلمەك.
نۇرسەرىك جولبارىس
