قوستانايلىق ونەرتاپقىش پلاستيكالىق بوتەلكەدەن سىپىرعىش جاساپ شىعاردى

استانا. قازاقپارات - قوستانايلىق ونەرتاپقىش ءاليحان نۋركين «Atameken Startup» بيزنەس- يدەيا بايقاۋىنىڭ جەڭىمپازى اتاندى. ءسويتىپ وعان 300 مىڭ تەڭگەنىڭ سەرتيفيكاتى تابىستالدى.

ونەرتاپقىش كادىمگى پلاستيكالىق بوتەلكەلەردەن ەكو-broom دەپ اتالاتىن سىپىرعىش جاساپ شىعاردى. ونىڭ سابى اعاشتان جاسالعانمەن، شىبىقتارىنا بوتەلكەلەر پايدالانىلىپتى. ءسويتىپ، ءاليحان قوقىسقا تاستالعان زاتتى كادەگە اسىردى، دەپ جازادى «قوستاناي تاڭى» گازەتى.

جالپى، «Atameken Startup» بيزنەس-يدەيا بايقاۋى قوستانايدى جىل سايىن ءوتىپ تۇرادى. وعان قاتىسۋشىلار وزدەرىنىڭ بيزنەس جوبالارىن ازىرلەپ، ونى قالاي جۇزەگە اسىرۋ كەرەكتىگىن دالەلدەۋى ءتيىس. بيىل بۇل بايقاۋعا وبلىس اۋداندارى مەن قالالارىنان 200 گە تارتا تالانتتى جاندار قاتىستى.