قىرىق قاباتتى عيماراتتىڭ قابىرعاسىنداعى الىپ ەكران قازاقتىڭ تۇلعالارىن كورسەتتى
بۇل جاڭالىق ەلدى ەلەڭ ەتكىزدى، قوناقتاردى ءسۇيسىندىردى، اعا ۇرپاق تامساندى، جاس ۇرپاق قىزىقتى. كەشكى 19 دان تۇنگى 1 گە دەيىن جارقىراعان ءتۇرلى ءتۇستى بەينەەكران كورەرمەندەرىن تاۋەلسىز قازاقستاننىڭ تامىلجىعان تابيعاتىمەن، تاريحي تۇلعالارىمەن تانىستىرادى.
اسىرەسە، ءال- فارابي باستاعان دۋلاتي، ياسساۋي، تولە ءبي، قازىبەك ءبي، ايتەكە ءبي، ابىلاي حان، ءابىلقايىر حانداردىڭ الىپ تۇلعاسىن كورگەندە، كەۋدەسىن ماقتانىش كەرنەمەگەن قازاق قالمايدى. قورىتا ايتقاندا، قالا تۇرعىندارىنىڭ ەڭسەسى ءبىر كوتەرىلىپ قالدى. وسىنداي باقىتتى كۇنگە جەتكىزگەن ەل ماقتانىشتارىن ەسكە الىپ، كوزىنە جاس العاندار دا بولىپتى. بۇل - قۋانىش جاسى.
عاسىردىڭ عاجاپ جاڭالىقتارىنىڭ ءبىرى دە بىرەگەيى استانا تورىندە، ونىڭ ىشىندە «قازاقستان تەمىر جولىنىڭ» ءساتتى ىسكە اسىرعانىنا ريزا بولماسقا شاراڭىز جوق.
- ورتا ازيا عانا ەمەس ت م د ەلدەرىندە تەڭدەسى جوق جوبا. قازىرگە دەيىن قازاقتىڭ تاريحي تۇلعالارى، تابيعاتى تۋرالى 15 كوركەم بەينە كورسەتسەك، الداعى ۋاقىتتا كوپشىلىك سۇرانىسىنا وراي ونىڭ اياسىن كوبەيتە تۇسپەكپىز. جالپى، جۇرت ريزاشىلىعىن بىلدىرۋدە، - دەيدى جوبا اتقارۋشىسى «ق ت ج» ۇ ك» ا ق فيليالى - «اكىمشىلىك عيماتتاردى پايدالانۋ جونىندەگى ديرەكسياسىنىڭ» ەلەكترمەن قامتۋ باسقارماسىنىڭ باستىعى.
راسىندا دا، قالايشا ريزا بولماسقا؟ ! باتىرلارىمىز بەن اقىندارىمىزدى جان- جاقتى دارىپتەۋدىڭ ءبىر قيسىنىن كەلتىرىپ، تىگىسىن جاتقىزىپ، وزگە ۇلتتاردىڭ دا ويىنا وتان ۇعىمىن ءسىڭىرۋدىڭ امالىن مىڭ مارتە قاراستىرىپ جاتقاندا، تەمىرجولشىلاردىڭ تاپقىرلىعى وزگەلەرگە ساباق بولارلىق ساۋاپتى ءىس.
قازىر الەمدى الەككە تۇسىرگەن ماسەلەنىڭ ءبىرى - تاۋەلسىزدىكتى ساقتاپ قالۋ. ونىڭ ءبىر جولى تاريحقا قايتا ورالۋ، تاريحقا ءتاۋ ەتۋ، ەرلىك ۇعىمىنىڭ قادىر- قاسيەتىن جاس ۇرپاققا ۇيرەتۋ. ەل ەرتەڭى ءۇشىن «كۇندىز وتىرماعان، تۇندە ۇيىقتاماعان» باتىرلار مەن شەشەندەردىڭ، كوسەمدەردىڭ دانالىعىن، مۇراتقا باستايتىن مۇراسىن ۇرپاقتان-ۇرپاققا امانات ەتىپ تاپسىرۋ - قازاق ءۇشىن دە باستى ماقسات.
وسى ورايدا ەلباسىنىڭ: «بايىرعى ۇلى بابالارىمىزدىڭ ۇرپاعى رەتىندە، بىرەۋدىڭ شايناپ بەرگەنىن مالدانۋ بىزگە جاراسپايدى» دەگەن ءبىر اۋىز ءسوزى بارشامىزدى ويعا قالدىرادى.
قازاق تاريحىنا «ق ت ج» (قازاقستان تەمىر جولى) سەكىلدى ورالۋ - وڭدى ءىس. ۇرپاق بويىنا ناعىز وتانشىلدىق رۋحىن سەبۋ دە وسىنداي باياندى باستامادان باستالادى. ەندى وزگە دە مينيسترلىكتەر، اگەنتتىكتەر مەن ءىرى كاسىپورىندار ۇلتتىق بولمىسىمىزعا وسىلايشا ءمان بەرىپ، داڭقتى تۇلعالاردىڭ كەسكىن- كەلبەتىن بارشاعا كەڭىنەن تانىستىرىپ جاتسا، نۇر ۇستىنە نۇر.
دۋاناباي جولداسبەك
«ايقىن»
