قازاقستان مەن قىتاي قورعاس وزەنىنەن «دوستىق» ورتاق سۋ تورابىن سالادى

استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى قورعاس وزەنىندە «دوستىق» بىرلەسكەن ورتاق سۋ تورابىن باسقارۋ جانە پايدالانۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى ماقۇلداندى.

اتالعان كەلىسىمگە بىلتىرعى جىلدىڭ قىركۇيەگىندە استانادا قول قويىلعان.

بۇل رەتتە «دوستىق» بىرلەسكەن ورتاق سۋ تورابى ەكى مەملەكەتتىڭ تەڭ ۇلەسكە يە ورتاق مەنشىگى بولىپ تابىلادى. قازاقستان مەن قىتاي تاراپتارىنىڭ ءارقايسىسىنىڭ اۋماعىندا بىرلەسكەن سۋ تورابىنا ۇزىندىعى ەكى ءجۇز مەتردى قۇرايتىن كىرمە جولدار دا كوزدەلەدى. ال سۋ تورابىن باسقارۋ مەن پايدالانۋ بارىسىندا ونىڭ سەنىمدىلىگى مەن قاۋىپسىزدىلىگى قامتاماسىز ەتىلەدى. سۋ كولەمىن جانە ەكولوگيالىق سۋ جىبەرۋدى رەتتەۋدىڭ بەلگىلەنگەن قاعيداتتارىن ساقتاۋ، تاسقىن سۋدىڭ ءوتۋىن قامتاماسىز ەتۋ شارالارى قاراستىرىلادى.

بۇدان بولەك، بىرلەسكەن سۋ تورابىن قاۋىپسىز پايدالانۋ ماقساتىندا تۇراقتى نەگىزدە جۇمىس ىستەيتىن جانە تەپە-تەڭدىك قاعيداتىن ساقتايتىن قازاقستان-قىتاي بىرلەسكەن قىزمەتى قۇرىلادى.

ءماجىلىس ماقۇلداعان زاڭ جوباسى پارلامەنت سەناتىنا جولدانادى.

اۆتور: قانات مامەتقازى ۇلى