ازىق-تۇلىك قاۋىپسىزدىگى جونىندەگى يسلام ۇيىمىنىڭ شتاب-پاتەرى قازاقستاندا ورنالاسادى

استانا. قازاقپارات - ازىق-تۇلىك قاۋىپسىزدىگى جونىندەگى يسلام ۇيىمىنىڭ شتاب-پاتەرى قازاقستاندا ورنالاسادى. بۇل تۋرالى بۇگىن پارلامەنت ءماجىلىسىنىڭ جالپى وتىرىسىندا اۋىل شارۋاشىلىعى ءمينيسترى اسىلجان مامىتبەكوۆ ءمالىم ەتتى.

ەسكە سالساق، جيىندا «ازىق-تۇلىك قاۋىپسىزدىگى جونىندەگى يسلام ۇيىمىنىڭ جارعىسىن راتيفيكاتسيالاۋ تۋرالى» زاڭ جوباسى تالقىلانعان بولاتىن.

اۋىل شارۋاشىلىعى ءمينيسترى اسىلجان مامىتبەكوۆتىڭ ايتۋىنشا، 2011-جىلى 28- ماۋسىمدا استانادا وتكەن يسلام ىنتىماقتاستىعى ۇيىمى سىرتقى ىستەر مينيسترلەرىنىڭ كەڭەسىنىڭ سەسسياسىندا پرەزيدەنت ن. نازاربايەۆ ۇيىم شەڭبەرىندە ازىق-تۇلىك بويىنشا ءوزارا كومەك تۋرالى باستاما جاساعان بولاتىن. «ازىق-تۇلىك رەسۋرستارىن ەكسپورتتايتىن مەملەكەت رەتىندە مۇنداي ۇيىمنىڭ شتاب-پاتەرىن قازاقستاندا ورنالاستىرۋ ۇسىنىلعان ەدى. بۇل باستامانىڭ اياسىندا قازاقستاننىڭ ۇسىنىسى يسلام ىنتىماقتاستىعى ۇيىمىنىڭ بارلىق مۇشە مەملەكەتتەرى تاراپىنان قولداۋ تاپتى»، - دەدى اسىلجان مامىتبەكوۆ.

ونىڭ ايتۋىنشا، ازىق-تۇلىك قاۋىپسىزدىگى جونىندەگى يسلام ۇيىمىنىڭ جارعىسى 2013- جىلدىڭ 10- جەلتوقسانىندا كوناكريدە ون توعىز مەملەكەتتىڭ وكىلدەرىمەن قابىلدانعان.

«ۇيىمنىڭ شتاب-پاتەرىن وزىندە قابىلداي وتىرىپ، قازاقستان يسلام ۇيىمىنىڭ اياسىنداعى ازىق-تۇلىك قاۋىپسىزدىگى ۇيلەستىرۋشى ءرولىن وزىنە الادى»، - دەدى مينيستر.

تۇتاستاي العاندا، ازىق-تۇلىك قاۋىپسىزدىگى جونىندەگى يسلام ۇيىمىنىڭ نەگىزگى ماقساتتارىنىڭ ءبىرى مۇشە مەملەكەتتەرگە اۋىل شارۋاشىلىعىن، ازىق-تۇلىك قاۋىپسىزدىگىن ءتيىمدى دامىتۋدىڭ، شولەيتتەنۋدەن، ورمان القاپتارىنىڭ ازايۋىنان، توپىراقتىڭ ەروزياسى مەن سورتاڭدانۋىنان تۋىنداعان پروبلەمالاردى شەشۋدىڭ جولىن ۇسىنۋ بولىپ تابىلادى. بۇدان بولەك، قاجەتتى شۇعىل جانە گۋمانيتارلىق كومەكتى ايقىنداۋ، ونىڭ ىشىندە ازىق-تۇلىك قاۋىپسىزدىگىنىڭ رەزەرۆتەرىن قۇرۋ كوزدەلەدى.

اۆتور: قانات مامەتقازى ۇلى