ەكسپو كورمەسىندە قازاقستاندىق عالىمدار وزىق جوبالارىن كورسەتپەك

استانا. قازاقپارات - 2017 - جىلعى ەكسپو كورمەسىندە قازاقستاندىق عالىمدار دۇنيەجۇزىلىك الدىڭعى قاتارلى تەحنولوگيالاردان ەش كەم تۇسپەيتىن ازىرلەمەلەرىن كورسەتە الادى.

بۇل تۋرالى كەشە ەكسپو-2017 حالىقارالىق مامانداندىرىلعان كورمەسىنە دايىندىق شەڭبەرىندە «استانا ەكسپو-2017» ۇلتتىق كومپانياسى مەن «پاراسات» ۇلتتىق عىلىمي- تەحنولوگيالىق حولدينگى» ا ق- پەن جانە سولتۇستىك قازاقستان وبلىسىنىڭ اكىمدىگىمەن ىنتىماقتاستىق تۋرالى مەموراندۋمعا قول قويۋ بارىسىندا «پاراسات» حولدينگىنىڭ باسقارما ءتوراعاسى ابدىكارىم زەينۋللين ايتتى.  

«2017 - جىلعى ەكسپو كورمەسىندە قازاقستاندىق عالىمدار الەم جۇرتشىلىعىن قانداي دا عىلىمي جەتىستىگىمەن تاڭقالدىرادى دەپ ايتۋ قيىن. دەگەنمەن، ءبىزدىڭ ەشكىمدى دە بەي- جاي قالدىرمايتىن، دۇنيەجۇزىلىك الدىڭعى قاتارلى تەحنولوگيالاردان ەش كەم تۇسپەيتىن ازىرلەمەلەرىمىز بار. ماسەلەن، الماتىداعى فيزيكا- تەحنولوگيالىق ينستيتۋت نەگىزىندە كۇن ساۋلەسىنەن ەنەرگيا الاتىن پانەلدەردى ادەتتەگىدەي اينەكتەن ەمەس، جۇمساق ماتەريالداردان جاساۋ بويىنشا جۇمىستار جۇرگىزىپ جاتىرمىز»، - دەپ اتاپ ءوتتى ول. 

  ونىڭ ايتۋىنشا، قازاقستاندىق عالىمدار سونىمەن قاتار، قۋاتى ۇزاققا جەتەتىن اككۋمۋلياتورلىق باتارەيالاردى جاساۋدى دا قولعا العان. «ويتكەنى ءبىزدىڭ جەر قويناۋىمىزدا الەم بويىنشا سيرەك كەزدەسەتىن مەتالداردىڭ مول قورى بار. ال قۋاتى كوپكە جەتەتىن «بولاشاقتىڭ» اككۋمۋلياتورلارى ءدال وسى سيرەك مەتالدار نەگىزىندە جاسالادى. ەگەر ءبىز شيكىزاتتى دا وزىمىزدەن شىعارىپ، ءونىمدى دە ءوزىمىز وندىرسەك، باسەكەلەس ورتا قالىپتاسىپ، اككۋمۋلياتورلاردىڭ باعاسى دا ارزانداي تۇسەدى»، - دەيدى ءا. زەينۋللين.   
 
 ايتا كەتەيىك، مەموراندۋمعا قول قويعان تاراپتار ەكسپو كورمەسىن قازاقستاندىق عالىمداردىڭ زەرتتەمەلەرىمەن قامتاماسىز ەتۋ ءۇشىن كۇش بىرىكتىرۋگە نيەتتى. سوعان سايكەس، «ەكسپو-2017 شەڭبەرىندە قازاقستان رەسپۋبليكاسىنىڭ تازا قۋات كوزدەرىن ازىرلەۋ تۋرالى» 2013-2017 - جىلدارعا ارنالعان باعدارلاماسى بويىنشا يننوۆاتسيالىق عىلىمي- تەحنيكالىق جوبالاردى جۇزەگە اسىرۋ جانە حالىقارالىق مامانداندىرىلعان كورمەدە ولاردى تانىستىرۋ جوسپارلانىپ وتىر.   

  مەموراندۋمعا سايكەس، «پاراسات» حولدينگى كورمەنىڭ «بولاشاق ەنەرگياسى» تاقىرىبىنا قاتىستى وتاندىق عالىمدار ازىرلەگەن جوبالاردى ۇسىنباق. كورمە اياقتالعان سوڭ «استانا ەكسپو-2017» ۇلتتىق كومپانياسى وعان ۇسىنىلعان جوبالار مەن ماكەتتەردىڭ تەحنولوگيالارىن وندىرىستە قولدانۋعا مۇمكىندىك الادى. «پاراسات» ۇ ع ت ح» ا ق باسشىسى حابارلاعانداي، قايتا جاڭارتىلاتىن ەنەرگەتيكا تۋرالى باعدارلامانىڭ عىلىمي نەگىزىن كۇن ەنەرگەتيكاسى، جەل ەەنەرگەتيكاسى، ءتۇرلى باعىتتاردى قامتيتىن ەنەرگەتيكا تۇرلەرى، سۋتەگى ەنەگەتيكاسى، بيو ەنەرگەتيكا، گەوتەرمالدى سۋ، شاعىن سۋ ەنەرگەتيكاسى جانە قۋات ۇنەمدەۋ سياقتى باعىتتار قۇراپ وتىر.

اۆتور:   ءابۋ- اسقار مەكەش ۇلى