پۋتيننىڭ توڭىرەگىندەگىلەر ءوزارا قىرقىسا باستادى
پرەمەر-مينيستر دميتري مەدۆەديەۆ باسقارىپ وتىر دەلىنگەن ءبىرىنشى توپتى رەسەيدىڭ الەمدىك ەكونوميكالىق جانە قارجىلىق جۇيەدەن وقشاۋلانىپ بارا جاتقانى الاڭداتادى. ال ەكىنشى توپ ەكونوميكادا مەملەكەتتىك باسقارۋدى كۇشەيتۋدى قالايدى. ەكىنشى توپ قۇرامىندا «روسنەفت» باسشىسى يگور سەچين جانە باسقا دا مەملەكەتتىك كومپانيالاردىڭ باسشىلارى، سونىمەن بىرگە ارنايى قىزمەت ارداگەرلەرى مەن قۇرامىنا سەرگەي يۆانوۆ كىرەتىن رەسەي ۇكىمەتى كۇش قۇرىلىمدارى بلوگىنىڭ وكىلدەرى بار ءتارىزدى.
«پۋتيننىڭ قول استىنداعى توپتاردىڭ ءوزارا قارسىلاسۋى سوعىس دەڭگەيىنە دەيىن قىزدى. تاڭداۋلى توپتار ازايىپ بارا جاتقان رەسۋرستار قورىنا تالاسىپ وتىر»، - دەپ مالىمدەدى پۋتيننىڭ ءبىرىنشى پرەزيدەنتتىك مەرزىمىندەگى كرەمل كەڭەسشىسى ستانيسلاۆ بەلكوۆسكي.
باسىلىم رەسەي ەكونوميكاسى رەتسەسسياعا جاقىنداعان سايىن ساياسي ەليتا وكىلدەرى اراسىنداعى كەلىسپەۋشىلىكتەردىڭ كۇشەيە تۇسەتىنىن جازدى. رۋبل مەن مۇناي مينيمۋمعا دەيىن قۇلادى. 6- قازاندا ماسكەۋلىك بيرجا ساۋداسىندا دوللار 16 جىلدان بەرى ءبىرىنشى رەت 40 رۋبلگە دەيىن قىمباتتادى.
«سيستەما ا ق ك باسشىسى ۆلاديمير ەۆتۋشەنكوۆتىڭ قاماۋعا الىنعانى مەن ونىڭ «باشنەفت» كومپانياسىن مەملەكەتتەندىرۋ وتقا ماي قۇيعانداي اسەر ەتتى. يۋكوس رەسەيلىك مۇناي كومپانياسىنىڭ بۇرىنعى باسشىسى ميحايل حودوركوۆسكي ەۆتۋشەنكوۆتىڭ قاماۋعا الىنعانىنان كەيىن وعان قارسى ءىستى باستاماشىلىق ەتكەن دەپ «باشنەفت» كومپانياسىن ساتىپ الۋعا قىزىعۋشىلىق ءبىلدىرىپ جۇرگەن سەچين دەپ مالىمدەدى.
سەچيننىڭ «روسنەفت» كومپانياسى وسى جىلدىڭ العاشقى سەگىز ايىندا مۇناي ءوندىرۋ مولشەرىن ايتارلىقتاي ازايتتى، باسشىسىمەن بىرگە باتىستىڭ سانكسيالىق تىزىمىنە ءتۇستى جانە مەملەكەتتىڭ قارجىلاي كومەگىنە مۇقتاج. دەرەككوزدىڭ ناقتىلاۋىنشا، ەۆتۋشەنكوۆ مەدۆەديەۆپەن جاقىن بايلانىستا جانە بيلىكتەگى الەۋەتتى بلوكپەن، ونىڭ ىشىندە رەسەي پرەزيدەنتى اكىمشىلىگىنىڭ باسشىسى سەرگەي يۆانوۆپەن داۋلى جاعدايدا. بەلكوۆسكي «ەۆتۋشەنكوۆ ءۇشىن كۇرەستە» مەدۆەديەۆ جەڭىلىپ، «باشنەفت» يۋكوس-تىڭ كۇنىن كەشەتىنىنە سەنىمدى.
امەريكالىق باسىلىمنىڭ جازۋىنشا، بۇعان دەيىن پۋتين توڭىرەگىنىڭ ۇستانىمى ۋكراينا ماسەلەسىنە بايلانىستى ەكىگە جارىلعان. ەندى ولار ەۆتۋشەنكوۆتىڭ ءىسى نەمەن بىتەرىن، ونىڭ سوڭىنان كىمنىڭ ەرەتىنىن كۇتىپ وتىر. پۋتيننىڭ باسپا ءسوز حاتشىسى دميتري پەسكوۆ بولسا، رەسەي پرەزيدەنتىنىڭ اينالاسىندا ەشقانداي دا داۋلى جاعدايدىڭ جوقتىعىن ايتتى.
Tengrinews.kz
