20:41, 09 - قازان 2014 | GMT +5
الماتىدا قىز بالاعا قول كوتەرگەن جاتتىقتىرۋشى قىلمىستىق جاۋاپكەرشىلىككە تارتىلۋى مۇمكىن
الماتى. قازاقپارات - الماتىدا قىز بالاعا قول كوتەرگەن جاتتىقتىرۋشى قىلمىستىق جاۋاپكەرشىلىككە تارتىلۋى مۇمكىن. بۇل تۋرالى قالالىق ءى ءى د باسپا ءسوز قىزمەتىنىڭ جەتەكشىسى سالتانات ازىربەك ايتتى.
«ول ايەلدىڭ ارەكەتىنەن ق ر ق ك 137 - بابى بويىنشا كورسەتىلگەن قىلمىستىڭ بەلگىلەرىن كورۋگە بولادى. كەلىنشەك كامەلەتتىك جاسقا تولماعان بالانى تاربيەلەۋدە ءوز مىندەتىن ورىنداماعانى ءۇشىن قىلمىستىق جاۋاپكەرشىلىككە تارتىلۋى مۇمكىن» ، - دەدى س. ازىربەك.
سالتانات ازىربەك مالىمدەگەندەي، اتالعان باپ بويىنشا بالانىڭ اتا- اناسىنان بولەك تاربيەلەۋ مىندەتى جۇكتەلگەن وزگە دە تۇلعالار جاۋاپتى بولادى.
قازىر اتالعان دەرەك بويىنشا تەرگەۋالدى تەكسەرۋ جۇرۋدە.
ەستەرىڭىزگە سالا كەتەيىك، كوركەم گيمناستيكادان جاتتىقتىرۋشى كەلىنشەكتىڭ قارشاداي قىزدى ۇرىپ سوققانى ءتۇسىپ قالعان بەينەجازبا بۇگىن عالامتور پايدالانۋشىلارى اراسىندا ۇلكەن نارازىلىق تۋعىزدى. كەلەڭسىز وقيعا الماتىداعى و. جارىلقاپوۆ اتىنداعى سپورت كەشەنىندە بولعان.
اۆتور: گۇلميرا عوسمانالي
