كاسپيدەن التايعا دەيىن ءجۇرىپ وتەتىن اۆتو ەكسپەديتسيا ورال قالاسىندا بولدى - فوتو
ورال قالاسىنىڭ ورتالىق كوشەلەرىمەن ءجۇرىپ وتكەن اۆتوەكسپەديتسيا مۇشەلەرى جەڭىس الاڭىنداعى ماڭگىلىك الاۋعا گۇل شوقتارىن قويدى.
وبلىستىق قازاق دراما تەاترىندا ەكسپەديتسيا مۇشەلەرىن باتىس قازاقستان وبىلىسى اكىمىنىڭ ورىنباسارى باقتيار ماكەن قارسى الىپ، ىزگى تىلەگىن ءبىلدىرىپ، تىلەك كارتاسىنا ءوز قولتاڭباسىن قالدىردى.
ماڭعىستاۋ وبلىسى اكىمدىگىنىڭ قولداۋىمەن قۇرىلعان اتالمىش ەكسپەديتسيا ەلىمىزدە قۇراستىرىلعان بەس وتاندىق اۆتوكولىكپەن ايعا جۋىق ۋاقىت بويى قازاقستاننىڭ بارلىق ءوڭىرىن ارالاپ شىقپاق. ەكسپەديتسيا قۇرامىندا كاسىبي جۇرگىزۋشىلەر، مەديتسينا قىزمەتكەرى، اكىمشى، ەتنوگراف، بلوگەر، جۋرناليستەر، ونەرپازدار، فوتوسۋرەتشىلەر - بارلىعى 20 ادام بار.
ەلباسى نۇرسۇلتان نازاربايەۆ ماڭعىستاۋ وبلىسىنا جۇمىس ساپارى كەزىندە اتالمىش ەكسپەديتسياعا وڭ ساپار تىلەگەن بولاتىن. ەكسپەديتسيا ماقساتى دا پرەزيدەنت جولداۋىنان تۋىندايتىن ماقسات- مىندەتتەردى، قازاقستاننىڭ ەكونوميكاداعى يگى وزگەرىس- جاڭالىقتارىن، ەل بىرلىگىن ناسيحاتتاۋ، جاستارعا جاسالىپ وتىرعان قامقورلىقتى پاش ەتۋ، ولاردى دا وتانىمىزدىڭ ودان ءارى وركەندەۋى جولىندا ايانباي ەڭبەكتەنۋگە ۇندەۋ بولىپ تابىلادى. تۇپكى ماقسات - قازاقستاننىڭ الەمنىڭ وزىق وتىز ەلىنىڭ قاتارىنا ەنۋىنە ۇلەس قوسۋ. ەلىمىزدىڭ ءار ءوڭىرىنىڭ ءوز ەرەكشەلىگى بار. ماقتان تۇتاتىن جەتىستىكتەرى، باي تاريحى، كورگەن ادام سۇيسىنەتىن تابيعاتى بار ەكەنى انىق. وسىنىڭ ءبارى ەكسپەديتسياعا قاتىسۋشىلاردى ۇلكەن اسەرگە بولەمەك. ولار سوندىقتان جوبا سوڭىندا ساپار تۋرالى فيلم ءتۇسىرىپ، 16ايماق تۋرالى فوتو كىتاپ شىعارۋدى جوسپارلاپ وتىر.
كيەلى ماڭعىستاۋدان باستاۋ الىپ، اتىراۋعا ايالداپ، ورالعا توقتاعان ەكسپەديتسيا ەندى اقتوبەگە باعىت تۇزەدى.
اۆتور: ەلجان ەرالى
