ەنەرگەتيكا ءمينيسترى سۇيىتىلعان گازدى ەل اۋماعىنان شىعارۋعا تىيىم سالۋدى ۇسىنادى

استانا. قازاقپارات - ەنەرگەتيكا مينيسترلىگى سۇيىتىلعان گازدى ەل اۋماعىنان شىعارۋعا تىيىم سالۋدى ۇسىنادى. بۇل تۋرالى كەشە پارلامەنت ءماجىلىسىنىڭ ەكولوگيا جانە تابيعاتتى پايدالانۋ كوميتەتىنىڭ كەڭەيتىلگەن وتىرىسىندا ءمالىم بولدى.

ەنەرگەتيكا ءمينيسترى ۆلاديمير شكولنيكتىڭ ايتۋىنشا، قازىر قازاقستاندىق نارىقتا سۇيىتىلعان مۇناي گازىن جەتكىزۋ تەتىگىندە ءبىرقاتار پروبلەمالار ورىن العان.

 «جەلىلىك گاز تاراتۋ كومپانيالارىنا، ۇيىمدارعا الەۋمەتتىك گازدان باسقا، سۇيىتىلعان گازدىڭ ەكسپورتىنا رۇقسات بەرىلگەن بولاتىن. الايدا، ءبىزدىڭ ەلىمىزدەن كوممەرسيالىق الدە الەۋمەتتىك گازدىڭ قايسىسى ەكسپورتتالىپ جاتقانىن ناقتى قاداعالاۋ مۇمكىن بولماي وتىر. زاڭ بويىنشا جەلىلىك ۇيىمداردىڭ سۇيىتىلعان مۇناي گازىن كوتەرمە ساۋدامەن ەكسپورتتاۋعا رۇقسات بەرىلگەن. ەگەر ونى ساتىپ الۋشىنىڭ اۆتو قۇيۋ بەكەتتەرى بولسا، ساتىپ الۋ - ساتۋ ۇدەرىسىندە ونىڭ العان گازى قايتا راسىمدەلەدى. ءسويتىپ، الەۋمەتتىك گاز ەكسپورتقا شىعىپ جاتىر»، - دەيدى مينيستر.

وسىعان وراي، ەنەرگەتيكا ءمينيسترى سۇيىتىلعان مۇناي گازىن ەلدەن تىسقارى شۋعارۋعا تىيىم سالۋدى ۇسىنادى. بۇدان بولەك، مينيستر قولدانىستاعى زاڭ تالاپتارىن ساقتاماي، ونى ورەسكەل بۇزۋشىلاردى قاتاڭ جازالاۋ كەرەكتىگىن ايتىپ، بۇل رەتتە ولاردى اكىمشىلىك جاۋاپكەرشىلىككە تارتۋ ءۇشىن زاڭ نورمالارىنا ارنايى وزگەرىستەر ەنگىزۋدى ۇسىنادى.  

 اۆتور:   قانات مامەتقازى ۇلى