ەلىمىزدە تۇڭعىش رەت قىزمەتتىك- ىزدەستىرۋ يتتەرىنىڭ حالىقارالىق جارىسى ءوتتى- فوتو
ق ر قارجى مينيسترلىگى كەدەندىك باقىلاۋ كوميتەتىنىڭ كينولوگيالىق ورتالىعى بازاسىندا ءوتىپ جاتقان اتالمىش جارىسقا جەتى مەملەكەت قاتىسۋدا. ولار: ارمەنيا، ازەربايجان، قازاقستان، قىرعىزستان، رەسەي، وزبەكستان جانە تاجىكستاننىڭ كەدەندىك قىزمەتتەرى. بۇل جەردە تاجىكستاننىڭ كەدەندىك قىزمەتى ازىرگە تەك باقىلاۋشى رەتىندە قاتىسىپ وتىر.
«قازاقستاندا مۇنداي جارىس تۇڭعىش رەتى وتكىزىلىپ جاتىر. بۇعان دەيىن ماسكەۋدە، باكۋدە جانە بىشكەك قالاسىندا وتكەن بولاتىن. الماتىعا ەڭ مىقتى دەگەن كوماندالار جينالدى. جارىس بەس كەزەڭنەن تۇرادى. ءاربىر كەزەڭ شىنايى جاعدايدا وتكىزىلەدى. ياعني كينولوگ- مامان ءوزىنىڭ يتىمەن ەسىرتكى زاتىن شابادانداردىڭ، جەڭىل جانە جۇك كولىگىنىڭ جانە بولمەنىڭ ىشىنەن ىزدەپ تابۋعا ارەكەت جاسايدى جانە بەسىنشى كەزەڭدە ءيتتىڭ ءتىلالعىشتىعى، ياعني يەسىنە باعىنا بىلەتىندىگى انىقتالادى. بۇل جەردە كينولوگ- مامان مەن ونىڭ ءيتىنىڭ ءوزارا ۇيلەسىمدى ارەكەت جاساۋى ۇلكەن ماڭىزعا يە»، - دەدى ءوز سوزىندە ق ر ق م ك ب ك كينولوگيالىق ورتالىعىنىڭ جەتەكشىسى رىسبەك سماقوۆ.
قازىر كوماندالار اراسىندا قول جۇگىنەن ەسىرتكى ىزدەۋ جارىسى باستالىپ كەتتى. بۇل جەردە تورەشىلەر سەگىز شاباداننىڭ ءبىرىنىڭ ىشىنە ەسىرتكى زاتىن جاسىرادى. ونى قىزمەتتىك- ىزدەستىرۋ ءيتى بارىنشا تەز تابۋى ءتيىس.
ونىڭ ايتۋىنشا، قىزمەتتىك- ىزدەستىرۋ يتتەرىن قولدانۋ - ەسىرتكى زاتتارىنىڭ عانا ەمەس، سونداي- اق جارىلعىش زاتتار، قارۋ- جاراق، ۆاليۋتا جانە ەلگە اكەلۋگە نەمەسە ەلدەن شىعارۋعا تىيىم سالىنعان باسقا دا زاتتاردىڭ زاڭسىز اينالىمىنا قارسى كۇرەستىڭ تيىمدىلىگىن ارتتىرا تۇسەدى.
«مىسالى، بيىل ەلىمىز بويىنشا زاڭسىز اينالىمنان 102,2 كەلى ەسىرتكى زاتتارى، ولاردىڭ ىشىندە 435 كەلى گەروين، 4,5 كەلى گاشيش جانە 51,7 كەلى ماريحۋانا تاركىلەنگەن بولسا، ولاردىڭ ىشىندە قىزمەتتىك- ىزدەستىرۋ يتتەرىنىڭ ارقاسىندا تاركىلەنگەن ەسىرتكى زاتتارىنىڭ سالماعى 60,2 كەلىنى قۇرادى. ەسىرتكى جانە باسقا دا تىيىم سالىنعان زاتتاردىڭ زاڭسىز اينالىمى بارعان سايىن كۇردەلەنە تۇسۋدە. سوندىقتان كينولوگيالىق قىزمەتتىڭ جۇمىسىن ۇنەمى جەتىلدىرىپ وتىرماسا بولمايدى. ول ءۇشىن وسىنداي حالىقارالىق دەڭگەيدە جارىستار ۇيىمداستىرۋ وتە ماڭىزدى» - دەدى ءوز سوزىندە ر. سماقوۆ.
كينولوگيالىق ورتالىق جەتەكشىسىنىڭ پىكىرىنشە، مۇنداي جارىستاردا ءبىرىنشى كەزەكتە كينولوگ ماماندار قىزمەتتىك- ىزدەستىرۋ يتتەرىن دايىنداۋ ادىستەمەسى جانە ەسىرتكى زاتتارىن ىزدەۋ تاسىلدەرى بويىنشا ءوزارا تاجىريبە الماسادى. سونىمەن قاتار، مىقتى كينولوگتار انىقتالىپ، ماراپاتتالادى. ال بۇل، كينولوگيالىق قىزمەتتىڭ دامۋىنا جاڭا سەرپىن بەرەدى.
اۆتور: جاپپاربەرگەن ايبوتا
