تۇركيا مىنەز تانىتتى
بۇعان سەبەپشى بولىپ وتىرعان دۇنيە اللەپو ولكەسىندەگى تۇرىك انكلاۆىندا جاتقان وسمان يمپەرياسىن قۇرۋشى وسمان سۇلتان-1 دىڭ اتاسى سۇلەيمەن شاحتىڭ مولاسىن «يسلام مەملەكەتىن» قۇرۋشى قارۋلى توپتىڭ قورشاپ، باسىپ الۋعا ۇمتىلۋى.
مۇنى رەسمي انكارا «تاۋەلسىز ەلدىڭ جەرىنە باسىپ كىرۋ» دەپ قابىلداۋدا.
سەنبى كۇنى ەل پرەزيدەنتى تايىپ رەجەپ ەردوعان: «سۇلەيمەن شاحتىڭ باسىن كۇزەتكەن تۇرىكتىڭ ارنايى قىزمەتىنىڭ اسكەرلەرىنە ەشكىم تيىسپەۋى ءتيىس. ەگەر دە بىردەڭە بولا قالسا، ءبىز قاراپ قالا المايمىز. كىمگە دە بولسا جەدەل «جاۋاپ» بەرە الامىز»، - دەپ جيحادشىلارعا ەسكەرتۋ جاساعان.
ارينە، تۇرىك اسكەرىنىڭ شەكارا ماڭىنا توپتالۋىنا سۇلەيمەن شاحتىڭ مولاسى اسەر ەتتى دەۋ، ارتىق بولار. شىندىعىندا انكارانىڭ كوزدەگەنى باسقا. وتكەن اپتانىڭ بەيسەنبى كۇنى تۇرىك پارلامەنتى يراك پەن سيرياعا اسكەر اتتاندىرۋعا رۇقسات بەردى. سونداي-اق اسكەر ترانسشەكارالىق وپەراتسيا جاساۋعا دا مۇمكىندىك الدى.
ەڭ باستىسى، بۇل شەشىم «ۇلتتىق قاۋىپسىزدىكتى قورعاۋ» ماقساتىندا دەپ اتالدى. بۇدان تىس تۇركيا «يسلام مەملەكەتى» توبىمەن كۇرەسۋ ءۇشىن ءوز جەرىن شەتەل اسكەرى پايدالانۋىنا دا مۇمكىندىك بەردى. دەمەك، كوپ ۇزاماي «ي م» توبىن قۇرتۋ تەك اۋەدەن بومبىلاۋمەن شەكتەلمەي، قۇرلىق اسكەرى دە سوعىسقا ەنبەك.
ويتكەنى پرەزيدەنت ەردوعان: «تەك اۋەدەن سوققى بەرۋ از، جەردەگى اسكەري كۇشتى دە پايدالانۋ كەرەك» دەگەن مالىمدەمە جاساعان. تۇركيا ءۇشىن قاۋىپ توندىرە باستاعان «ي م» توبىمەن كۇرەسۋ ءوز الدىنا، ەڭ باستىسى، سيريا جەرىندە بوسقىندارعا ارناپ «بۋفەرلىك ايماق» قۇرۋ. وسىلايشا سيريا جەرىندە قانتوگىس ۇرىس جۇرگىزىپ جاتقان «ي م» توبىنان تۇرىك ەلىنىڭ قاۋىپسىزدىگىن قامتاماسىز ەتۋ ءارى ءوز جەرىندەگى كۇردىلەردىڭ سيريا كۇردىلەرىمەن ارالاسۋىنا توسقاۋىل قويۋ.
ويتكەنى سيريادا ءجۇرىپ جاتقان قاقتىعىستان قاشقان 180 مىڭ ادام بوسقىن رەتىندە تۇرىك شەكاراسىنان بەرى اسقان. مۇنىڭ ءوزى تۇركيا ءۇشىن ۇلكەن قاۋىپ.
«ايقىن»
