ۇلى بريتانيا ازاماتشاسى وزىنە-ءوزى ۇيلەندى

استانا. قازاقپارات - باتىس ەلدەرى ءبىرجىنىستى نەكەدەن جالىقسا كەرەك، قازىر ولار وزدەرىنە وزدەرى ۇيلەنە باستادى.

بۇل تۋرالى today.kz سايتى جازدى. 

ۇلى بريتانيانىڭ گرەيس گەلدەر ەسىمدى بويجەتكەنى كۇنى كەشە ءوز-وزىمەن نەكەلەسىپ، دۇركىرەتىپ توي جاسادى. The Guardian باسىلىمىنىڭ حابارلاۋىنشا، ديەۆون گرافتىعىندا وتكەن سالتاناتتى شاراعا 50 دەن استام قوناق كەلگەن.

وسىدان تۋرا جارتى جىل بۇرىن بويجەتكەن قالالىق ساياباقتا وتىرىپ، وزىنە-ءوزى ءسوز ايتقان كورىنەدى. كەيىن بۇل قيالىن جۇزەگە اسىرماق بولىپ قالىڭدىقتىڭ كويلەگى مەن ساقيناسىن دا ساتىپ العان. ال اتا-اناسى قىزدارىنىڭ بۇل ارەكەتىنە تۇسىنىستىكپەن قاراعان ەكەن.

سوڭعى 6 جىل كولەمىندە گەلدەر ەشقانداي جىگىتپەن كوڭىل جاراستىرماپتى. ءتىپتى، جىگىتپەن تانىسۋدىڭ ءوزى ول ءۇشىن ۇلكەن ماسەلە ەكەنىن جاسىرمايدى. سوندىقتان ۇيلەنۋ تويى ومىرىنە وزگەرىس الىپ كەلەدى دەپ ويلاعان.

ال جاقسى جىگىت تابىلىپ جاتسا، بولاشاقتا گەلدەر وعان كۇيەۋگە شىعۋعا دايىن.

ايتا كەتەيىك، ءوز-وزىنە ۇيلەنۋ ءالى ەشقانداي ەلدە زاڭداستىرىلماعان.

 

24.kz