مەملەكەتتىڭ اتاۋىن «قازاق ەلى» دەپ اتاساق، قايتەدى؟

استانا. قازاقپارات - قازاقستاننىڭ گرۋزياداعى ەلشىسى ەرمۇحامەت ەرتىسبايەۆ «قازاق ەلى» دەگەن ۇعىمدى قوعامدىق ساناعا سىڭىرەتىن كەز كەلدى دەپ ەسەپتەيدى.

«بىلەسىزدەر مە، گرۋزين تىلىندە «گرۋزيا» دەگەن ءسوز جوق. مەملەكەتتىڭ اتاۋى ءار تىلدە ءارتۇرلى اتالادى...

كونستيتۋتسيادا «ساكارتۆەلي» دەپ جازىلعان، بۇل گرۋزين جەرى» دەگەن ماعىنا بەرەدى. تۇرعىندار وزدەرىن «كارتۆەلي» دەپ اتايدى. سوندىقتان بىزگە دە «قازاق ەلى» دەگەندى قوعامدىق ساناعا ەنگىزە بەرگەن ءجون. اسىرەسە، بۇل پاتريوتتىق رۋحتى كوتەرۋ ءۇشىن قاجەت» دەيدى ەلشى.

گۇلشات نۇرىمبەتوۆا، ساياسي عىلىمدار دوكتورى، پروفەسسور:

-  ارينە، ەلدىڭ، جاستاردىڭ، جالپى، قوعامنىڭ ساناسىنا سىلكىنىس جاساۋ ءۇشىن ءبىر نارسە كەرەك. وندا دا رۋحتى وياتاتىن، وتانشىلدىققا جەتەلەيتىن ىلگەك بولۋى كەرەك. ول مەنىڭشە، «قازاق ەلى» دەگەن اتاۋ. ءبىر وكىنىشتى دۇنيە، بىزدە تالاي يگى باستامالار كوتەرىلەدى. ءبىراق كوبىنە جالعاسپاي قالادى. لاتىن قارپىنە كوشەمىز دەپ شابىلدىق. ونىڭ دا ارتى بەلگىسىز. قوعام ءارى-ءسارى كۇيدە قالدى.

«قازاق ەلى» دەپ اتالىپ جاتسا، جاقسى. ءبىراق ءبىز الەمدىك ساياساتقا، جالپى، تورتكىل دۇنيەگە «قازاقستان» نە بولماسا «قازاقستان رەسپۋبليكاسى» دەگەن اتاۋمەن تانىلدىق. مويىندالدىق. حالىقارالىق قۇجاتتارعا دا سولاي بەكىتىلدىك. ەندى كەلىپ وزگەرتكىمىز كەلەدى. بۇل ءبىر جىلدىڭ دۇنيەسى ەمەس، بالكىم، جۇرە كەلە قالىپتاسار. ءبىراق حالىقتىڭ ساناسىنا اقىرىن-اقىرىن سىڭىرە بەرسەك ارتىق بولماس دەپ ويلايمىن.

سايىن بورباسوۆ، ساياساتتانۋشى:

- شىن مانىندە، قازاقستان دەگەن اتاۋ ەشقانداي قورقىنىشتى ەمەس. ءبىراق ۋاقىت وتە كەلە مەملەكەتتىڭ اتىن وزگەرتىپ جاتساق، ودان ءبىر جامان استار ىزدەۋگە بولمايدى. سوناۋ تاۋەلسىزدىككە قول جەتكىزگەن كەزدە قازاقستاندا قازاقتىڭ سانى 41 پايىز عانا ەدى. قازىر 67 پايىزعا كوتەرىلدىك. ەندى الداعى جيىرما جىلدا 80 پايىزعا كوتەرىلۋگە ءتيىسپىز.

قۇداي انالارىمىزدىڭ، جارلارىمىزدىڭ قۇرساعىنا ساۋلىق بەرسىن دەلىك.

دەمەك، كوپ ۇزاماي ءبىز موناۇلتتىق مەملەكەتكە قول جەتكىزەمىز. سول كەزدە «قازاقستان» ەمەس، «قازاق ەلى»، نە بولماسا، «قازاق رەسپۋبليكاسى» دەپ اتاۋىمىزعا بولادى. ءتىپتى قازاق رەسپۋبليكاسى دەپ جاتساق، وتە جاقسى. ويتكەنى الەمدەگى دەموكراتيالىق مەملەكەتتەردىڭ بارلىعى وزدەرىن «رەسپۋبليكا» دەپ اتايدى. ماسەلەن، فرانسۋز رەسپۋبليكاسى، ت. ب. ياعني ەرمۇحامەت ەرتىسبايەۆ ايتقانداي، وسى باستان حالىقتىڭ ساناسىنا قۇيا بەرگەن دۇرىس. بۇل جونىندە جاقىندا ۇلىتاۋدا بولعان سۇحباتىندا ەلباسى نۇرسۇلتان نازاربايەۆ تا جاقسى ايتقان. دەمەك، سەڭ قوزعالدى. سونى حالىق ەندى ءىلىپ اكەتۋى كەرەك.

دايىنداعان سەيسەن امىربەك ۇلى

«ايقىن»