شىمكەنتتە ايەل تەرەڭ قۇدىقتا تۇنەپ شىقتى

استانا. قازاقپارات - شىمكەنت تۇرعىنى كەلەڭسىز جاعدايعا تاپ بولدى. «سامال» شاعىن اۋدانىنىڭ تۇرعىنى ءتۇن ىشىندە تەرەڭ شۇڭقىرعا قۇلاپ قالعان.

شۇڭقىردىڭ تەرەڭدىگى - 7 مەتر. ارنايى قازىلىپ، جان-جاعى بەتوندالعان. قۇلاعان ازاماتشا قاراڭعىدا بايقاماي قالسا كەرەك. زارداپ شەككەن ايەلدىڭ داۋسىن تاڭعى 6 دان اسقاندا دالاعا شىققان كورشىلەرى ەستىپ، كومەككە كەلەدى. دەگەنمەن، تەرەڭ شۇڭقىردان وزدەرى شىعارىپ الا الماعان سوڭ قۇتقارۋشىلارعا حابار بەرگەن.

توتەنشە جاعداي دەپارتامەنتىنىڭ قۇتقارۋ قىزمەتى جاساعىنىڭ ماماندارى وقيعا ورنىنا جەدەل اتتانادى. بۇعان قوسا حابار بەرگەندەر جەدەل جاردەم دارىگەرلەرىنە دە قوڭىراۋ شالعان بولاتىن. قۇتقارۋشىلار ايەلدى ارنايى الپينيستىك ارقاننىڭ كومەگىمەن سىرتقا شىعارىپ الدى.

ايەل امان. اياق-قولى دا ساۋ. ازداپ دەنەسىن اۋىرتىپ، جاۋراپ قالعان ەكەن، دەپ حابارلايدى Otyrar. кz.