قىتايلىق سىيلىق

استانا. قازاقپارات - الماتى وبلىسىنا قاراستى، "اباي" ورتا مەكتەبىنىڭ مۇعالىمى، اتا-انالاردىڭ "ۇستازدار كۇنىنە" اپەرگەن سىيلىعىن الماي قويىپتى.

دۇرىسى - ءبىرىنشى "ءا" سىنىبىنىڭ جەتەكشىسى گۇلبانۋ ايتماحان قىزىنا، اتا-انالاردىڭ ءارقايسىسى 1 مىڭ تەڭگەدەن قاراجات جيناپ، تارتۋ ەتكەن توسىن سىيى ۇناماي قالعان كورىنەدى.

اتا-انالاردىڭ ايتۋىنشا، ۇستاز ءمانتى پىسىرگىش ىدىستى قىتاي تاۋارى بولعاندىقتان، ۇناتپاعان سىڭايلى. الايدا، ءبىلىم ورداسى وكىلدەرىنىڭ بۇل جاعدايعا قاتىستى ايتار ءوز ءۋاجى بار.

ساباقتىڭ باستالعانىنا ءبىر ايدان ەندى عانا اسقانىمەن، روزا تاجىكوۆا ءبىرىنشى سىنىپتا وقيتىن قىزىنىڭ سىنىبىن اۋىستىرماق. وعان سىيلىق ۇناتپايتىن ۇستازدىڭ قىلىعى سەبەپ بولدى دەپ وتىر. ءوزىن اتا-انالار كوميتەتىنىڭ مۇشەسى دەپ تانىستىرعان روزا، تارتۋدى تاڭدايتىن، سىيدى مەنسىنبەيتىن مۇعالىمنىڭ سىنىبىنا قىزىمدى وقىتقىم كەلمەيدى، - دەيدى.

روزا تاجىكوۆا، اتا-انالار كوميتەتىنىڭ مۇشەسى:

بۇگىن باسقا كلاسقا بارىپ، اۋىستىردىم. ازاندا كەلدىم دە. مەدسەسترانىڭ ءوزى بىلەدى، ۆالەريانكا ءىشىپ، اۋىرىپ ءولىپ قالا جازدادىم.

روزانىڭ ايتۋىنشا، قىزى وقيتىن سىنىپتاعى اتا-انالاردىڭ ءارقايسىسى، 1 مىڭ تەڭگەدەن اقشا جيناپ، "ۇستازدار كۇنىنە" وراي، سىنىپ جەتەكشىسىنە سىيلىق جاساپتى. "مۇعالىمنىڭ تاپسىرىسىمەن ءمانتى پىسىرەتىن ىدىس العانبىز، الايدا، سىنىپ جەتەكشىسى، قولىمىزدى كەرى قايتارىپ قانا قويماي، نامىسىمىزعا ءتيدى، دەپ قاپالى.

ءبىراق بازاردان العان تاۋاردى اتا-انالار كوميتەتىنىڭ مۇشەسى، ساۋداگەرلەرگە قايتا وتكىزە الماعان. ال، ءوزىن مەكتەپتىڭ مەدياتورىمىن، ياعني داۋلى، شيەلەنىستى جاعدايلاردى شەشۋ ءۇشىن جۇمىس ىستەيمىن دەپ تانىستىرعان ءبىلىم ورداسىنىڭ وكىلى بولسا، اتا-انالاردىڭ ءوزارا كەلىسپەۋشىلىگىنەن تۋعان ماسەلە، ويتكەنى، اتا-انالاردان جينالعان 10 مىڭ تەڭگەگە، روزا تاجىكوۆا 2500 تەڭگەنىڭ تاۋارىن ساتىپ اكەلگەن، - دەيدى.

مۇحيت ەرجان ۇلى، مەكتەپ مەدياتورى:

بۇل جەردە ۇلكەن ءبىر ۋشىقتىراتىن دۇنيە كورىپ تۇرعان جوقپىز. ويتكەنى، بىزدەردە، مەكتەپتە مەدياتورلار جۇمىس ىستەيدى. ەكى جاقتىڭ كەلىسىمىمەن ، وڭتايلى شەشىشىمەن بۇل ماسەلەنى شەشۋگە بولادى دەپ ويلايمىن.

يرينا سوۆەتجان قىزى، ءتىلشى:

داۋ تۋدىرعان ىدىس وسى. تۇرىنە قاراساڭ، ارزان اتۋارعا ۇقسامايدى. ءبىراق بازاردان ساتىپ الىنعان. سوندىقتان اتا-انالار كوميتەتىنىڭ مۇشەسى، ۇستازعا ۇناماعان سىيلىقتى قايتادان بازارعا وتكىزە الماي الەك. ال، ەرتەڭنەن باستاپ، وسى جاعداي سەبەپ بولىپ، سىنىبىن اۋىستىرعان روزا تاجىكوۆانىڭ قىزى، جاڭا سىنىپتاعى وقۋىنا بارادى.

31-ارنا