امەريكاعا جۇماق ءومىر ىزدەپ بارعان الماتىلىق كەلىنشەك قاڭعىپ قالدى

استانا. قازاقپارات - امەريكادا اداسقاندار. مۇحيتتىڭ ارعى جاعالاۋىنا تابىس ىزدەپ كەتكەن وتانداسىمىز ەندى ەلگە جەتە الماي تەنتىرەپ ءجۇر.

32 جاستاعى الماتى تۇرعىنى ليۋدميلا يۆاحنو «كوك قاعازعا قارىق بولامىن» دەپ امەريكا اسقان ەكەن.

كوزسىز تابىسقا سەنگەن كەلىنشەك وزىمەن بىرگە شەتەلگە قارتايعان اناسى مەن كىشكەنتاي قىزىن دا ەرتە كەتىپتى. الايدا، بارعان جەرىندە وپىق جەپ قالدى. ۋادە ەتىلگەن تابىستىڭ ورنىنا زورلىق كورىپ، ودان قالدى نيۋ-يوركتاعى قاڭعىباستار ۇيىنەن ءبىر-اق شىققان.

- مەن بۇل جاق جۇماق دەپ ويلادىم...

ليۋدميلا باق پەن بايلىق ىزدەپ، ەندى بارماعىن شايناپ وتىر. 32 جاستاعى كەلىنشەك مول تابىسقا كەنەلەمىن دەپ الماتىدان بىردەن امەريكاعا تارتقان.

ليۋدميلا يۆاحنو:

- قۇجاتتاردى جاساعان اقىسى جانە جول اقىسى بار بارلىعىنا 5 جارىم مىڭ دوللار بەردىك. امەريكادا تۋىسىم بار دەپ جالعان انىقتاما جاساتقانىمدى مويىندايمىن. ويتكەنى، وڭباي الداندىق. امەريكاسى قۇرىسىن، ەندى ەلگە قايتقىم كەلەدى.

كەلىنشەك شەتەلگە وزىمەن بىرگە 5 جاسار قىزى مەن كارى شەشەسىن دە ەرتە كەتىپتى. قازىر ەندى ۇشەۋى دە قاڭعىباستىڭ كۇيىن كەشۋدە. نيۋ-يوركتىڭ كىلەڭ كەدەيلەر مەن باۋكەسپە-ۇرىلارى شوعىرلانعان برونكس دەگەن بولىگىندە تۇرىپ جاتىر. جىعىلعان ۇستىنە جۇدىرىق. جاقىندا ليۋدميلانى سونداعى كەلىمسەكتەردىڭ ءبىرى زورلاپ تاستاعان.

- ادام قاراسى از جەرگە اپارىپ سوندا زورلادى...

امەريكادا زورلىق كورىپ، قاڭعىباستىققا سالىنعان وتانداسىمىزدى ەلدە قالعان ەت جاقىن تۋىستارى كەرى قايتارا الماي زار ەڭىرەپ وتىر. ويتكەنى، ليۋدميلانىڭ ءوزى دە، شەشەسى مەن قىزى دا جات جەرگە جالعان قۇجاتتارمەن كەتكەن.

تاتيانا شۋلگا، تۋىسى:

- نە ۇيقى جوق، نە تاماق باتپايدى. بارماعان جەرىم قالمادى. بارلىق مەملەكەتتىك مەكەمەلەردىڭ تابالدىرىعىن توزدىردىم. تۋىستارىمدى قايتارۋعا كومەكتەسىڭىزدەرشى. ءتىپتى، وبامانىڭ وزىنە كومەك سۇراپ حات جازدىم...

ال ءبۇتىن ءبىر وتباسىنى شەتەلگە بوسقىن ەتىپ جىبەرگەن «مەگاتورونتو» دەگەن مەكەمە ەكەن. ۇشان-تەڭىز مول تابىستى ۋادە ەتكەن دە وسى مەكەمە. ماڭدايشاسىنا كانادا، وزگە دە الىس-جاقىن شەتەلدەرگە وڭاي جونەلتەمىز دەگەن تاقتايشا ىلىنگەن. الايدا، بۇل جەردەن قانداي دا ءبىر اقپارات الۋ مۇمكىن ەمەس.

- يۆاحنولاردىڭ وتباسىن شەتەلگە جونەلتكەن مەكەمەدە كۇزەتشىدەن باسقا ءتىرى جان بولماي شىقتى. دۇيسەنبى كۇنىن ءوز-وزدەرىنە دەمالىس جاريالاسا كەرەك. ال جالعان قۇجاتتارمەن ا ق ش-تا قالىپ قويعان ليۋدميلا ءوزىن زورلاعان كەلىمسەكتەن تاعى ءبىر قىز بوسانعان. سول سەبەپتى، ەندى ءۇش ەمەس، ءتورت بىردەي وتانداسىمىز تۋعان جەرگە جەتە الماي الىس امەريكادا تەنتىرەپ ءجۇر. ال ەلىمىزدىڭ سىرتقى ىستەر مينيسترلىگى ليۋدميلاعا قاتىستى بارلىق جايتتى انىقتايمىز دەپ سەندىردى.

 Ktk.kz