كولىك جۇرگىزۋدى ۇيرەنىپ ءجۇرىپ، قىزدى قاعىپ ءولتىردى

شىمكەنت. قازاقپارات - شىمكەنتتە كولىك جۇرگىزۋدى ۇيرەنىپ ءجۇرىپ، قىزدى قاعىپ ولتىرگەن ايەل سوتتالدى. بۇل تۋرالى ءال- فارابي اۋداندىق سوتىنىڭ باسپا ءسوز قىزمەتىنەن حابارلاندى.

قايعىلى وقيعا بيىل شىلدە ايىندا بولعان.

«تاسكەن كەنتىنىڭ تۇرعىنى «БМВ-520»  كولىگىن جۇرگىزۋدى ۇيرەنىپ جۇرگەن. ول بەرىلىس قورابىنىڭ تۇتقىشىن ارتقى جىلدامدىققا قويىپ، گازدى باسقان. ورنىنان ىتقي قوزعالعان ماشينانى ساسقالاقتاعان جۇرگىزۋشى توقتاتىپ ۇلگەرمەگەن. قارسى تۇراتىن كورشىسىنىڭ اۋلاسىن قيراتا كىرگەن كولىك ويناپ جۇرگەن كامەلەتتىك جاسقا تولماعان قىزدى باسىپ كەتتى. ول الىنعان جاراقاتتاردان اجال قۇشتى»، - دەپ حابارلادى اۋداندىق سوتتىڭ باسپا ءسوز قىزمەتىنەن.

وعان ق ر  ق ك 296 - بابىنا سايكەس ايىپ تاعىلدى. ءال- فارابي اۋداندىق سوتىنىڭ ۇكىمىمەن 2 جىلعا باس بوستاندىعىنان ايىرىلدى. الايدا سوت ق ر ق ك 63 - بابىنا سۇيەنىپ، 2 جىلدىق سىناۋ مەرزىمىمەن شارتتى ۇكىم شىعاردى.  سوتتالعان ايەل  2 جىلداي كولىك جۇرگىزۋ قۇقىعىنان دا ايىرىلدى.