پىلدەر كەي ادامداردان مەيىرىمدى بولىپ شىقتى - كەسكىن

استانا. قازاقپارات - شۆەيتساريانىڭ سيۋريح قالاسىنداعى حايۋاناتتار باعىندا تۇسىرىلگەن پىلدەردىڭ ءومىرى جايلى بەينەروليك الەۋمەتتىك جەلىلەردە كەڭىنەن تاراپ كەتتى.

كوڭىل تەربەتەرلىك كادردا ءبىر جارىم ايلىق وميشا اتتى كىشكەنتاي پىلگە «ۇلكەندەر جاعى» جانۇشىرا كومەككە ۇمتىلعانى انىق كورىنىس تاپقان.

كەسكىن 2 ايدىڭ ىشىندە 3,3 ميلليون رەت كورىلىپتى، دەپ حابارلايدى Metro.

ءوزى قالت-قۇلت ەتىپ ارەڭ جۇرگەن كىشكەنتاي ءپىل جىرادان شىعا الماي قينالادى. ءارى-بەرى تىرمىسىپ كورىپ ەدى، وماقاسا قۇلادى دا، اقىرىپ جىبەردى. سول-اق ەكەن ونىڭ داۋىسىن ەستىگەن ەكى ۇلكەن ءپىل كومەككە جۇگىرىپ كەلدى. ولار وميشانى دەمەپ ءجۇرىپ اياعىنان تۇرعىزدى.

YouTube قولدانۋشىلارى پىلدەردىڭ بۇل ارەكەتىنە تاڭ-تاماشا قالدى.

«وعان ەشقانداي قاۋىپ ءتونىپ تۇرماعانىن كورىپ تۇرسا دا، ولار جۇگىرىپ كەلدى. ءوز باسىم ەرەكشە اسەرگە بولەندىم، بەينە ءبىر ادامدار سەكىلدى ارەكەت ەتتى»، - دەپ جازدى روليكتى كورۋشىلەردىڭ ءبىرى.

BNews.kz