ەربولات توعىزاقوۆ: «بۇلتتارعا سوقپاق» فيلمىندە مەن ءوزىمدى سومدادىم
جالعىز قالعان ارلان ىسپەتتى. ونى تەك جۇمىسى، ءوزىنىڭ ومىرلىك وزگەرمەيتىن زاڭدارى، جانە وكىنىشكە تولى وتكەن ءومىرى عانا تولعاندىرادى. بەلگىلى قازاقستاندىق اكتەر مىلقاۋدىڭ ءرولىن تاماشا سومدادى.
- ءسىز ءۇشىن وسى ءرولدىڭ ەڭ باستى قيىندىعى نە بولدى؟
- ماعان وسى ءرولدى ۇسىنعاندا، مەن رەجيسسەرگە ونىڭ وتە قيىن ەكەنىن بىردەن ايتتىم. ونىڭ ۇستىنە، ونداي ادامداردىڭ ءوزىن ءوزى قالاي ۇستايتىنىن مەن بىلمەيمىن، ال ونىڭ كەيىپىنە كىرۋ ءۇشىن ولاردىڭ ءومىرىن، مىنەزىن زەردەلۋ قاجەت ەدى، ال وعان ۋاقىت جوق بولاتىن. رەجيسسەر ماعان ومىردەگى ۇلكەن ەموتسيالىق كۇيزەلىستەن كەيىن سويلەۋ قابىلەتىنەن ايىرىلعان ادامدى سومداۋ قاجەت ەكەنىن ايتتى.
- ءوزىڭىز سومداعان كەيىپكەر تۋرالى تولىعىراق ايتىپ وتسەڭىز.
- مەنىڭ كەيىپكەرىم ءبىر نارسە ايتقىسى كەلىپ، ىمدايدى، ءبىراق ونىسىنان ەشتەڭە شىقپايدى. شىنىمدى ايتسام، بۇل ءرول مەنىڭ وزىمە قاتتى ۇناپ قالدى. مەن ءوزىم سومداعان كەيىپكەردىڭ ىشكى دۇنيەسىن بىلۋگە تىرىستىم. ول بالالاردى جانىنداي جاقسى كورەتىن جالعىزىلىك ادام. بىلاي الىپ قاراسام، مەنىڭ كەيىپكەرىم وزىمە ۇقسايدى. «بۇلتتارعا سوقپاق» فيلمىنىڭ اۆتورلارى مەنىڭ وسى ءرولدى سومداي الاتىنىمدى سەزدى، دەپ ويلايمىن. ەڭ قيىنى ءوز كەيىپكەرىمنىڭ ەموتسياسىنىڭ شىنار بيىگىن كورسەتۋ بولدى. ول ءارقاشان ءبىر نارسەنى دالەلدەۋگە تىرىسادى، ۇنەمى مىنەز كورسەتەدى، ءبىراق ءبىر ءسوز ايتا المايدى، تەك ىمدايدى.
فيلمدە مىنانداي ءبىر ءسات بار، كورشى ايەل «ۇلىمنىڭ قالى قالاي ەكەن»، دەپ سۇرايدى، سول كەزدە ەموتسيا باستالادى: مەنىڭ كەيىپكەرىم تىنىم تاپپاي بەزەكتەيدى، ونى قينايتىن ءبىر- اق سۇراق: «مەنىڭ دە ۇلىم بار ەمەس پە، ال مەن مۇندا نە ىستەپ ءجۇرمىن؟ !» . مىنە، سول كەزدە مەن ءوزىمدى ونى ىزدەمەگەنىم ءۇشىن جەكسۇرىن رەتىندە سەزىندىم. ەڭ مىقتى ەپيزود، ارينە، ەڭ سوڭىندا، ءبىراق فيلمگە دەگەن قىزىعۋشىلىقتى تومەندەتپەس ءۇشىن ونى ايتپاي- اق قويايىن.
- «شال» فيلىمىنەن كەيىن ءسىز ەل تانيتىن، تانىمال اكتەرگە اينالدىڭىز. وسى فيلمدە وزىڭىزبەن قاتار ويناعان ارتىستەرگە قاراپ، ءوزىڭىزدى جۇلدىز، ال ولاردى بولاشاعى الدا تۇرعان شاكىرتتەر رەتىندە سەزىنبەدىڭىز بە؟
- مەن ءوزىمدى جۇلدىز رەتىندە سەزىنبەيمىن، ەشقاشان سەزىنگەن ەمەسپىن، ويتكەنى ماعان اۋدارىلىپ جاتقان نازار تىم جوعارى دەپ سانايمىن. بىزدە كوپتەگەن تاماشا جۇلدىزدار، ادامدار، اكتەرلەر بار، مەن ولار مەنەن الدەقايدا جاقسى دەپ ويلايمىن. ءبىراق «شال» فيلىمىنەن كەيىن مەنى قاتتى كوتەرىپ جىبەردى، ءيا- ءيا، كوتەردى، بالكىم، بۇل تاعدىردىڭ ماعان بەرگەن سىيى شىعار. ءبىراق، شىنىن ايتسام، مەن سونشا كوڭىل بولگەندى ۇناتپايمىن، قىسىلامىن. مەنى نەلىكتەن جۇلدىز سانايتىنىن تۇسىنبەيمىن. تاعى قايتالاپ ايتايىن، مەنەن ارتىق كوپتەگەن كينو جانە تەاتر اكتەرلەرى بار. ال مىنا فيلمدى الساق، مۇندا ماڭىزدىسى اكتەرلەر ەمەس، سسەناريدىڭ ءوزى. ەڭ باستى نازاردى ونداعى وقيعالارعا اۋدارعان ءجون. ولار بۇگىنگى ومىردەن الىنعان، وتە وزەكتى وقيعالار. مەن اركىم ءوزىنىڭ كىم ەكەنىن ەسكە الىپ، ءوزىنىڭ ومىرلىك قۇندىلىقتارىن تارتىپكە كەلتىرۋ كەرەك دەپ ەسەپتەيمىن. قاراپايىم سوزبەن ايتساق، مەيىرىمدىرەك بولۋ كەرەك.
- ەگەر ءسىز سومداعان رولدەردى سارالاساق، ءسىز كومەدياعا قاراعاندا، بايسالدى فيلمدەردە، درامالاردا كوبىرەك وينايدى ەكەنسىز. سىزگە درامالىق رولدەر كوبىرەك ۇناي ما؟
- ولار مەنىڭ كوزقاراسىمدى، دۇنيەتانىمىمدى بىلدىرەدى. ادەتتە، وسىنداي فيلمدەردە مەن ءوزىمدى ءوزىم سومدايمىن، سوندىقتان ماعان ويناۋ جەڭىل تيەدى. مەن ءوز كەيىپكەرىممەن مۇڭداس بولامىن. مەن وسى قالادا، وسى قوعامدا، وسى ەلدە ءومىر سۇرەمىن. سوندىقتان ماعان ءوزىم سومداعان ادامداردىڭ كوڭىل- كۇيى، ومىرلىك ۇستانىمى ەتەنە تانىس. مەن ءوزىمدى، نەمەسە وزىمە تانىس ادامداردى سومدايمىن. مەن ءارقاشان ءوز كەيىپكەرىممەن مۇڭداسپىن. مىنە، مىلقاۋ ءرولى - ول ءوز ەرەجەسىمەن ءومىر سۇرەتىن ادام. ول نە ىستەسە دە، ءوزىنىڭ ار- ۇياتىنا سايكەس، ءادىل ىستەيدى. مەنىڭ ومىردەگى ۇستانىمىم دا سونداي. مەن ومىرگە تەز بەيىمدەلە المايتىن اداممىن. جانە مەن ءۇشىن اقشا ومىردەگى باستى نارسە ەمەس. مەنى قوعامىمىزداعى ماسەلەلەر قاتتى تولعاندىرادى.
جالپى، مەنىڭ ايتارىم، اعا بۋىن وكىلدەرىنە ساتقىندىق پەن ارامدىق باسىم بولىپ بارا جاتقان زاماناۋي ومىردەن ءوز ورنىن تابۋ قيىنداپ بارادى. جان- جاعىڭا قاراساڭ، مىنا ادامدارعا نە بولعان، نەگە اقشا، بيلىك جانە جەڭىل تابىس تابۋ قۇمارلىعى ءومىر امىرشىسىنە اينالعان دەگەن ويعا شوماسىڭ. مەن ءوزىمدى باسقا ۋاقىتتىڭ ادامى رەتىندە سەزىنەمىن، ول كەزدە بىزدە باسقاشا تاربيەلەدى. سوندىقتان «بۇلتتارعا سوقپاق» فيلىمى - ول جانايقاي.
تۇسىنەسىز بە؟ ءبىزدى ءادىل بولۋعا، باسقا ادامدى سىيلاۋعا، وعان قۇرمەتپەن قاراۋعا، قولىڭنان كەلسە، كومەك بەرۋگە ۇيرەتتى. ال قازىر قاراساڭ - انا جاقتا جارىلىس، مىنا جاقتا كىسى ءولتىرۋ ورىن الىپ جاتادى. كەيدە ءتىپتى، جاساعان يەم بىزگە اشۋلانىپ جاتقانداي كورىنەدى، مىنا تابيعي اپاتتاردىڭ بارلىعى، ءزىلزالالار، سۋ تاسقىنى - سونىڭ قاھارى، ەسكەرتۋى ىسپەتتى. ول ءبىزدى نە كۇتىپ تۇرعانىن كورسەتىپ، بىزگە ءبىر- ءبىرىڭدى قۇرمەتتەڭدەر، ءبىر- ءبىرىڭدى باعالاڭدار، جۇدىرىقتاسىپ، بايلىق قۋالاماڭدار، دەيتىن سياقتى. مەن ءبىزدىڭ بارلىعىمىزعا وسى جايىندا ويلاناتىن كەز كەلدى دەپ، ويلايمىن. قازاقستاندا ادامداردى شىنايى قۇندىلىقتار تۋرالى ويلانۋعا ماجبۇرلەيتىن فيلمدەردىڭ كوبەيىپ كەلە جاتقانى قۋانتادى.
365info.kz
