وبلىس اكىمى اقىن مەن پالۋانعا كولىك سىيلادى
بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.
كەڭەس وداعىنىڭ باتىرى، قارماقشى اۋدانىنىڭ پەرزەنتى تايىمبەت كومەكبايەۆتىڭ قۇرمەتىنە وراي سالىنعان ەسكەرتكىشتىڭ اشىلۋ سالتاناتىندا وبلىس اكىمى قىرىمبەك كوشەربايەۆ اۋىل تۇرعىندارىن قۇتتىقتاپ، ءسوز سويلەدى.
«اۋىلدىڭ ءبىلىمدى، مادەنيەتتى، ونەردى دامىتۋ جونىندەگى باعدارلامالارىنا سايكەس ءوسىپ، وركەندەگەن، جاڭارعان اۋىلدىڭ بۇگىنگى كورىنىسى كوز قۋانتادى»، - دەدى وبلىس اكىمى.
ەكى كۇندىك مەرەكەلىك ءىس- شارادا ت. كومەكبايەۆ اۋىلىنداعى جاڭا مەشىتتىڭ، «جەڭىستىڭ 70 جىلدىعى اتىنداعى» ساياباقتىڭ اشىلۋ ءراسىمى بولىپ، اقىندار ايتىسى، جىراۋلار بايقاۋى، قازاقشا كۇرەس، تۇيە پالۋان، گىر تاسىن كوتەرۋ، قول كۇرەس ويىندارىنان جارىستار ۇيىمداستىرىلدى.
سالتاناتتى كەش سوڭىندا، وبلىس باسشىسى شارا اياسىندا ۇيىمداستىرىلعان اقىندار ايتىسىنىڭ جەڭىمپازى مامىر بايداۋلەتوۆكە، قازاقشا كۇرەستەن كۇشى باسىم ءتۇسىپ، جەڭىسكە جەتكەن پالۋان ايبەك سەرىكبايەۆقا جەڭىل اۆتوكولىك كىلتىن تابىستادى.
مەرەيتويعا شاقىرىلعان «نۇر- مۇقاسان» توبى، روزا ءالقوجا، جەڭىس سەيدوللا ۇلى، ەربولات ەرجانبايەۆ، تورەعالي ءتورالى، ەركىن نۇرجانوۆ ت. ب. ەسترادا جۇلدىزدارى ءان شىرقادى.
اۆتور: ەلۋباي اۋەزوۆ
