الەمدىك دەڭگەيدەگى وزىق كومپانيالار قۇرۋعا قازاقستاندا بارلىق جاعداي بار - ەلباسى

استانا. قازاقپارات - الەمدىك دەڭگەيدەگى وزىق كومپانيالار قۇرۋعا ءبىزدىڭ بارلىق جاعدايمىز بار.

بۇگىن استانادا «سامۇرىق-قازىنا» قورىنىڭ ترانسفورماتسيا باعدارلاماسىنىڭ تانىستىرىلىمىنا ارنالعان فورۋم بارىسىندا ق ر پرەزيدەنتى نۇرسۇلتان نازاربايەۆ وسىلاي مالىمدەدى.

«ەلىمىزدىڭ بايلىعى «سامۇرىق-قازىنا» قورىنا شوعىرلانعان، ال بۇل - حالىقتىڭ بۇگىنگى ءھام كەلەشەك ءال-اۋقاتى. ءبىز ترانسفورماتسيانى قالاي ورىنداساق، ەلىمىز دە سولاي داميتىن بولادى. شەكسپيردىڭ «بولۋ، الدە بورداي توزۋ» دەگەن سۇراعى دا ءدال ءبىزدىڭ الدىمىزدان شىعادى»، - دەدى ن. نازاربايەۆ.

پرەزيدەنت بۇل رەتتە وسىنداي جۇمىستى قولعا العان مەملەكەتتەردىڭ تەك 30 پايىزى عانا جەتىستىككە جەتكەنىن، قالعان 70 پايىزىنىڭ جولى بولماعانىن اتاپ ءوتتى. «بىزگە وسى جولى بولماعان جەتپىس پايىزدىڭ ىشىندە قالماۋدى ويلاستىرۋىمىز قاجەت»، - دەگەندى باسا ايتتى مەملەكەت باسشىسى. ەلباسىنىڭ سوزىنە قاراعاندا، ترانسفورماتسيا باعدارلاماسى الەمنىڭ «سامۇرىق-قازىناعا» ۇقساس قورلارىنىڭ تاجىريبەسىنە سۇيەنە وتىرىپ جاسالعان.

ماسەلەن، سينگاپۋرلىق «تەماسەك» قورى 2004 - جىلعى ترانسفورماتسيا ناتيجەسىندە كومپانيا كاپيتالىن 3 ەسەگە، 54 ميلليارد دوللاردان 107 ميلليارد دوللارعا جەتكىزگەن. «تەماسەكتى» مەملەكەتتىك اكتيۆتەردى باسقاراتىن جەكەمەنشىك كومپانيا دەپ تە اتايدى. جوعارى باسشىلىقتارى ۇكىمەتپەن تاعايىندالادى، الايدا مەملەكەت «تەماسەككە» ەشقانداي جەڭىلدىك تە، پرەفەرەنتسيا دا ۇسىنبايدى. سينگاپۋرلىق قور بيرجاسىنداعى جيىنتىق قارجىلاندىرۋدىڭ 21 پايىزى «تەماسەك» كومپانياسىنىڭ اكتسياسىنان تۇرادى»، - دەدى ن. نازاربايەۆ.

بۇدان بولەك، ەلباسى ءدال وسىنداي مالايزيالىق جانە اراب كومپانيالارىن مىسالعا الا وتىرىپ، «ولاردان قاي جەرىمىز كەم؟» دەگەن سۇراقتى توتەسىنەن قويدى.

«بىزدە مۇمكىندىك مول. قازاقستاندا قاراجات تا، رەسۋرستار دا، ەڭ باستىسى ءبىلىمدى حالىق بار. ءبىزدىڭ قازاقستاندىقتاردىڭ 98 پايىزى ورتا بىلىمگە يە، شەتەلدەردە دە وقىتۋدى جالعاستىرىپ جاتىرمىز. ەندەشە، وسىنداي وزىق تاجىريبەلەردى پايدالانىپ، ولاردى ءىس جۇزىنە اسىرۋ كەرەك»، - دەدى ن. نازاربايەۆ.

سونداي-اق، استانادا وتكەن فورۋم بارىسىندا ق ر پرەزيدەنتى نۇرسۇلتان نازاربايەۆ بىزگە الەمدىك اتاۋلار قالىپتاستىرۋ كەرەك، ودان ەش قورقۋدىڭ قاجەتى جوق، - دەپ مالىمدەدى.

«ءبىز ءتىپتى جوق جەردەن مەملەكەت قۇردىق ەمەس پە؟ كەڭەس وداعىن كۇل-پارشاسى شىعىپ سىنعان ىدىس رەتىندە اتادى. ال سونىڭ ىشىندە تاقىر جەردەن قازاقستاندى تۇرعىزدىق. قازاقتار تۋرالى، قازاقستان تۋرالى ەشكىم دە بىلمەيتىن. قازىر بۇكىل الەم قازاقستاننىڭ قايدا ورنالاسقانىن بىلەدى. ءبىز مەملەكەتتى وزگەرتتىك، استانامىزدى سالدىق، ەكونوميكانى اۋىستىردىق. ەندىگى مىندەت - ترانسفورماتسيا»، - دەدى نۇرسۇلتان ءابىش ۇلى.

بۇدان بولەك، ەلباسى الەمدىك ەڭبەك بولىنىسىندە دە قازاقستان ءوزىنىڭ لايىقتى ءارى سەنىمدى ورنىن يەلەنۋى تيىستىگىن اتاپ ءوتتى. «ەڭ ماڭىزدىسى - قوردىڭ الدىندا ۇلتتىق اۋقىمداعى مىندەتتەر تۇر»، - دەدى ن. نازاربايەۆ.

اۆتور: قانات مامەتقازى ۇلى