ن. نازاربايەۆ: «سامۇرىق- قازىنا» قورىنىڭ جيىنتىق اكتيۆتەرى قازاقستاننىڭ جالپى ىشكى ءونىمىنىڭ تەڭ جارتىسىن قۇراپ وتىر

استانا. قازاقپارات - قوردىڭ جالپى جيىنتىق اكتيۆتەرى قازاقستاننىڭ جالپى ىشكى ءونىمىنىڭ تەڭ جارتىسىن قۇراپ وتىر.

 استانادا «سامۇرىق- قازىنا» ا ق ترانسفورماتسيا باعدارلاماسىنىڭ تۇساۋكەسەرىنە ارنالعان فورۋم بارىسىندا ق ر پرەزيدەنتى نۇرسۇلتان نازاربايەۆ وسىلاي مالىمدەدى.

 «بيىل شيكىزاتقا تاۋەلدى بولۋدان كەتۋگە باعىتتالعان ءبىزدىڭ يندۋستريالاندىرۋ باعدارلامامىزعا بەس جىل تولادى. بۇعان ءتۇرلى كوزقاراسپەن قاراۋعا بولادى، الايدا ءبىرىنشى بەسجىلدىقتا قۇرا العان 700 كاسىپورىننىڭ ماڭىزى زور. ەكىنشى بەسجىلدىق يننوۆاتسيالىق نىسانداردان تۇرادى. مىنە، وسىلاردىڭ بارلىعى ەلىمىزدىڭ كونفيگۋراتسياسىن، جالپى ەڭبەككە دەگەن كوزقاراستى وزگەرتەتىن بولادى. ءبىز مۇلدەم جاڭا جۇمىس ورىندارىن قۇراتىن بولامىز»، - دەدى ن. نازاربايەۆ.

وسى رەتتە پرەزيدەنت «كەشەگى كەڭەستىك ينەرتسيانىڭ تىم كۇشتى بولعانىن، بۇل ادامدار ساناسىنان وزگەرتۋدەگى ەڭ قيىن مىندەت بولعانىن» اتاپ ءوتتى.

 «ال قازىرگى مىندەت - بۇرىنعىدان زور، ونى قالاي اتقارساق، كەلەشەگىمىز دە سولاي قۇرىلادى. ويتكەنى، «سامۇرىق- قازىنا» مەملەكەتتىڭ ەڭ ءىرى اكتيۆتەرىن جيناپ وتىر. تەمىرجول، مۇناي- گاز رەسۋرستارى، تاسىمال، تەلەكوممۋنيكاتسيا، ەنەرگەتيكا، اتوم ونەركاسىبى، الەمنىڭ 19 ەلىنە 600 دەن استام باعىتتاعى قاتىناۋلارى بار حالىقارالىق اۆياتاسىمالى - مۇنىڭ بارلىعى «سامۇرىق- قازىنا». قوردىڭ جالپى جيىنتىق اكتيۆتەرى قازاقستاننىڭ جالپى ىشكى ءونىمىنىڭ تەڭ جارتىسىن قۇراپ وتىر. سوڭعى ءۇش جىلدا قور بيۋدجەتكە 2,5 ترليون تەڭگەدەن استام قاراجات اۋداردى. «سامۇرىق- قازىنا» ەلىمىزدەگى ەڭ ءىرى جۇمىس بەرۋشى - 350 مىڭ جۇمىس ورنى بار»، - دەدى ن. نازاربايەۆ.

اۆتور: قانات مامەتقازى ۇلى