قىزىلوردا وبلىسىنىڭ اكىمى بۇيرەگى اۋىستىرىلعان ناۋقاستىڭ كوڭىلىن سۇرادى

قىزىلوردا. قازاقپارات - كەشە قىزىلوردا وبلىسىندا سوزىلمالى بۇيرەك اۋرۋىنا شالدىققان ناۋقاسقا تۇڭعىش رەت بۇيرەك ترانسپلانتاتسياسى جاسالعان بولاتىن.

بۇگىن وبلىس اكىمى ق. كوشەربايەۆ ناۋقاستىڭ كوڭىلىن سۇراپ، ساۋىعىپ كەتۋىن تىلەدى. بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.

ەڭ اۋىر وپەراتسيالاردىڭ ءبىرى بولىپ ەسەپتەلەتىن وتانى وبلىستىق مەديتسينا ورتالىعىنىڭ حيرۋرگتەرى مەن ا. سىزعانوۆ اتىنداعى ۇلتتىق  عىلىمي حيرۋرگيا ورتالىعىنىڭ دارىگەرلەرى بىرلەسىپ جاسادى. قىزىلوردا قالاسىنىڭ تۇرعىنى ەرداۋلەت بوزعۇلوۆقا تۋعان قارىنداسى جاڭاگۇل بوزعۇلوۆا دونورلىق جاساپ، ءبىر بۇيرەگىن بەردى. دارىگەرلەردىڭ ايتۋىنشا، قازىر ەكەۋىنىڭ دە جاعدايى قالىپتى.

ۇلتتىق  عىلىمي حيرۋرگيا ورتالىعىنىڭ باس ديرەكتورى  جەتكەرگەن ارزىقۇلوۆ ءساۋىر ايىندا بۇيرەك ترانسپلانتالوگياسىن مەڭگەرۋ ءۇشىن قىزىلوردالىق دارىگەرلەر  ا. ن. سىزعانوۆ اتىنداعى ۇلتتىق  عىلىمي حيرۋرگيا ورتالىعىندا ءبىلىمىن جەتىلدىرىپ قايتقانىن ايتتى.

بۇگىنگى كۇنى وبلىستىق مەديتسينا ورتالىعىندا وتا جاساۋ ءۇشىن بارلىق جاعدايلار جاسالعان، كەرەكتى قۇرال- جابدىقتارمەن قامتاماسىز ەتىلگەن. جالپى وڭىردە بۇيرەك جەتىسپەۋشىلىگىنە دۋشار بولىپ، گەمودياليزدە وتىرعان 100 دەن  استام ناۋقاس بار. ونىڭ 45 ى دونوردى كۇتىپ، كەزەكتە تۇر. كەلەسى بۇيرەك اۋىستىرۋ وتاسى قاراشا ايىندا جاسالادى دەپ كۇتىلۋدە.

 «دەنساۋلىق سالاسىنا بيىل 35 ميلليارد تەڭگەگە جۋىق قارجى قاراستىرىلدى. بۇل وتكەن جىلمەن سالىستىرعاندا 18 پايىزعا ارتىق. وبلىس دارىگەرلەرى تاجىريبەلەرىن تولىقتىرىپ، كۇردەلى وپەراتسيالاردى وزىمىزدە جاسايتىن بولدى. بۇل مەديتسينا سالاسىنداعى تاعى ءبىر جەتىستىك»، - دەدى وبلىس اكىمى ق. كوشەربايەۆ.

 اۆتور:   ەلۋباي اۋەزوۆ