قوستانايدا جەمقورلىق ىسىنە قاتىسى بار شەنەۋنىك تەرەزەدەن سەكىرىپ كەتتى

استانا. قازاقپارات - جەمقورلىققا قاتىسى بار دەپ ايىپتالىپ جاتقان قوستاناي وبلىستىق ساۋلەت-قۇرىلىس باقىلاۋ دەپارتامەنتىنىڭ قىزمەتكەرى فاريدا تايىربەرگەنوۆا كوپ قاباتتى ءۇيدىڭ بەسىنشى قاباتىنان ءوزىن تاستاپ جىبەردى.

وقيعا سوت وتىرىسى بولاتىن كۇنى تاڭەرتەڭ ورىن العان. «سترويتەل» مادەنيەت ءۇيىنىڭ ماڭىنداعى كوپ قاباتتى ۇيلەردىڭ بىرىندە تۇراتىن تايىربەرگەنوۆا ساعات 7:40 تا وزىنە قول جۇمساماق بولىپ، ەڭ جوعارعى قاباتتان سەكىرىپ كەتكەن. مۇنى سول ماڭايدان ءوتىپ بارا جاتقان تۇرعىنداردىڭ بارلىعى كورىپتى.

باسىلىمنىڭ حابارلاۋىنشا، فاريدا وسى ءۇيدىڭ ءۇشىنشى قاباتىندا تۇرادى ەكەن. كورشىلەرىنىڭ ايتۋىنشا، ول قىلمىستىق ءىس قوزعالعالى بەرى وزىنە كەلە الماي جۇرگەن كورىنەدى. ال سۋيتسيدكە كۋا بولعاندار تايىربەرگەنوۆادان الكوگولدى ىشىمدىكتىڭ ءيىسىن بايقاعانىن ايتىپ وتىر.

ابىروي بولعاندا، دەپارتامەنت قىزمەتكەرى امان قالىپ، دەرەۋ اۋرۋحاناعا جەتكىزىلدى. قازىر ول جانساقتاۋ بولىمىندە. جانىنان «مەنىڭ ولىمىمە ەشكىم كىنالى ەمەس» دەگەن حات تا تابىلىپتى. ايتا كەتۋ كەرەك، اتالعان جەمقورلىق ءىس بويىنشا ول بىرنەشە جىلعا سوتتالۋى مۇمكىن. ايىپتاۋشى تاراپتىڭ ايتۋىنشا، تايىربەرگەنوۆا پارا بەرۋشى مەن الۋشى تاراپتاردىڭ ورتاسىنداعى دەلدالدىڭ قىزمەتىن اتقارعان.

24.kz