اجەمنىڭ ىستىق باۋىرساعى
- باكە، تاماققا بارمايسىز با؟ - دەگەن داۋىسىن ەستىگەندە عانا تۇسكى اس ۋاقىتىنىڭ تاياپ قالعانىن ۇقتىم. جۇمىس ۇستەلىمنەن بۇرىلىپ، سامارقاۋ عانا بارمايتىندىعىمدى ەسكەرتتىم. شارشاپ وتىرعانىمدى سەزدى مە، كىم ءبىلسىن؟ ! ايتەۋىر، ودان ءارى مازالاپ بارۋىمدى وتىنگەن جوق.
ءسال ويلانىپ تۇردى دا، جالعىز تاماقتانىپ قايتۋعا بەل بۋدى-اۋ شاماسى، ءۇنسىز كابينەتتەن شىعىپ كەتتى. شىنى كەرەك، قارىنىم شۇرقىراپ اكەتىپ بارادى، نەگە ەكەنى بەلگىسىز اسقا تابەتىم جوق. بالكىم، سەبەپ: «جۇمىستىڭ، كۇندەلىكتى كۇيبىڭ تىرشىلىكتىڭ اسەرى شىعار...» - دەپ ويلادىم دا، تۇسكى دەمالىستى پايدالانىپ الەۋمەتتىك جەلىلەرگە كىردىم. قۇدايدىڭ قۇتتى كۇنى كىرەتىن ۆ ك-تە قازىر ءار ادامنىڭ ەكىنشى جارتىسىنا اينالعالى قاشان؟! كۇنىنە ءۇش ۋاقىت تاماقتانۋدى ۇمىتىپ كەتسەك تە، ءۇش ۋاقىت ۆ ك-عا كىرۋدى قازا جىبەرمەيمىز. سونىمەن قويشى، نە كەرەك، ۆ ك-نىڭ ءوزىم بىلەتىن قۋىس-قالتارىسىن، بۇرىش-بۇرىشىن، بارلىق تامىر-تانىسىمنىڭ جاڭالىقتارىن قاراپ وتىرسام، ادامنىڭ تابەتىن اشىپ تومەندەگى سۋرەتتىڭ كولبەڭ ەتىپ شىعا قالماسى بار ما، ودان كەيىن وتكەنگە ۇڭىلگىش جۇيرىك كوڭىلىم بالالىق شاققا ساياحات جاساتىپ جىبەردى.
...بالا كەزىم. تۇنىمەن قوي كۇزەتكەن ادامداي، جۇمساق توسەكتە ارى-بەرى اۋناپ، ۇيقىنىڭ جازاسىن بەرىپ جاتىرمىن. نەگىزى ۇيقىدان ويانعانىما ءبىراز ۋاقىت بولعان، تەك جىلى توسەگىمدى سۋىتقىم كەلمەي، ەركەلەپ جاتقانىم بولماسا، ۇيقىنىڭ اۋىلى باياعىدا الىستاعان. تۇرار، تۇرماسىمدى بىلمەي ويىممەن ارپالىسىپ جاتقانىمدا، دالا جاقتان مۇرىنىما جاعىمدى ءبىر ءيىس كەلدى. بالىقشى بالىقشىنى الىستان تانيدى دەگەندەي مۇرىنىم دا تانىس ءيىستىڭ اپامنىڭ ىستىق باۋىرساعى ەكەندىگىن اجىراتىپ، دەرەۋ ساناما حابار بەرە باستادى. سول ساتتە ءبىر جىلى جۇمساقتىڭ حابارىن سەزگەندەي قارىنىم دا شۇرقىراپ قويا بەردى. باعاناعى ءناپسىنىڭ جەڭۋىمەن جىلى توسەكتەن تۇرعىسى كەلمەي جاتقان دەنەم، مۇرىننىڭ باستاۋىمەن، قارىننىڭ قوستاۋىمەن ەرىكسىز نوقتالانعان وگىزدەي تانىس ءيىس شىققان جاققا دەدەكتەي جونەلدى. ويلاعانىمداي، اجەم شەكەسىندەگى ءاجىمى تەرەڭدەي تۇسە، قارا قازان، سارى بالا قامى ءۇشىن تاڭ بوزىنان تۇرىپ باۋىرساق پىسىرۋدە ەكەن. شورشىعان شورتانداي التىن تۇستەس باۋىرساقتار ۇيقىمنىڭ تەز اشىلىپ، دەرەۋ جۋىنىپ كەلۋىمە ۇلكەن سەبەپكەر بولدى.
اجەم دە مەيىرلەنە قاراپ، ىستىق باۋىرساق ۇسىنعان ايالى الاقانىمەن جىلۋىن توگە باسىمنان سيپادى...
ويلاپ وتىرسام، سول كەز ناعىز باقىتقا تولى كۇندەرىمنىڭ ءبىرى ەكەن. قادىرىنە ەندى جەتتىم. شىركىن، انانىڭ ىستىق الاقانىنان، سول قولدارمەن پىسىرىلگەن استان ارتىق بۇل دۇنيەدە اۋقات بار ما ەكەن؟!
«انانىڭ كوڭىلى بالادا، بالانىڭ كوڭىلى دالادا» - دەپ اتام قازاق بەكەر ايتپاعان-اۋ... بالكىم، مەن دە سۋرەتتەگى ىستىق باۋىرساقتى كورمەگەندە اۋىلداعى اجەمدى ەسكە الماس پا ەدىم، كىم ءبىلسىن؟! ءبىراق، ءبىر بىلەرىم، وسىنداي عازيز جانداردىڭ جۇرەگىنىڭ ءاردايىم «ۇرپاعىم» دەپ سوعىپ تۇراتىندىعى.
اسىل اجەم، اللا تاعالادان ءبىر تىلەرىم، شىجىعىمدى كورسەتكەن مەنىڭ، قىزىعىمدى كورگەنىڭىزگە دەيىن ابزال جۇرەگىڭىز ىستىق مايدا ءوزىڭىز پىسىرگەن باۋىرساقتاي بۇلكىلدەۋىن توقتاتپاسىنشى...
باۋىرجان جالەل
kazaitys.kz
