ۇرلاعان مالىن قازاقستاندا ميلليونعا ساتقان شەتەلدىك ازامات ۇستالدى
اتالمىش ۆەدومستۆونىڭ حابارلاۋىنشا، 11- تامىزعا قاراعان ءتۇنى قارابۋرا اۋدانى كوكساي اۋلىنىڭ ماڭىنداعى سۋۋلۋ-ارىبەك جايىلىمىنان بەلگىسىز بىرەۋلەر جەرگىلىكتىڭ تۇرعىننىڭ 23 باس ءىرى قارا مالىن ايداپ اكەتكەن. تالاس اۋدانى مەن قارابۋرا اۋداندىق ءى ءى ب-ءنىڭ قىزمەتكەرلەرىنىڭ قولعا العان شارالارىنىڭ ناتيجەسىندە اتالمىش قىلمىسقا قاتىسى بار دەگەن كۇدىكپەن وسى اۋداننىڭ 1967-جىلى تۋعان تۇرعىنى ۇستالعان. ول بۇعان دەيىن ەسىرتكىگە قاتىستى قىلمىسى ءۇشىن سوتتالعان ەكەن.
ۇستالعان ازامات ءوزىنىڭ سىبايلاستارىمەن بىرگە ۇرلانعان مالدى شەكارادان ايداپ وتكىزىپ، قازاقستاندا 1 ميلليون تەڭگەگە 16 سيىر مالىن ساتىپ ۇلگەرگەن.
كۇدىكتىنىڭ ءۇيىن ءتىنتۋ كەزىندە ونىڭ قوراسىنا جينالعان ءشوپتىڭ اراسىنان 12 كەلى 800 گرام ماريحۋانا تابىلعان. قازىرگى كەزدە ول قاماۋعا الىنعان، تەرگەۋ امالدارى جۇرگىزىلۋدە، دەپ حابارلايدى kginform.com.
