قىتايداعى قازاق جاستارى العاش رەت «جايدارمان» وتكىزدى
شاعىن زالعا ستۋدەنتتەر لىق تولعان. نەگىزىنەن مۇندا شىڭجاننان كەلىپ، قىتاي استاناسىندا ءبىلىم الىپ جاتقان قازاق ستۋدەنتتەرى جينالدى. ويتكەنى، ۇيىمداستىرۋشىلار دا - وسى وڭىرلىك قانداستارىمىز.
ويىننىڭ شىمىلدىعىن قازاقستاندىق ستۋدەنتتەردىڭ «استانا» كومانداسى اشىپ بەردى. ءار كوماندا دا ءبىرى- بىرىنەن ەرەكشەلەنۋگە تىرىستى. ەلىكتەۋشىلىك، قويىلىمنىڭ سوزىلىپ كەتۋى سياقتى كەمشىلىكتەردى جاستار كوتەرگەن وزەكتى ماسەلەلەر جۋىپ- شايىپ اكەتتى. ستۋدەنتتەر قىتايشا ارالاستىراتىن ەتنيكالىق قازاقتار مەن ورىسشا قوساتىن قازاقستاندىق جاستاردى ازىلگە اينالدىردى. ستۋدەنتتىك ءومىردىڭ قىزىقتارىن كورسەتتى. كورەرمەندەر ءار قويىلىمعا قۇلشىنا قول سوعىپ، قولداپ وتىردى.
شالقار عازيز، قازىلار مۇشەسى:
- وتە تاماشا كۇيگە بولەندىك. تەك كۇلكىگە عانا ەرىك بەرمەي، كوپتەگەن وي تۇيدىك. كەيبىر كەلەڭسىز جايتتاردى تۇيرەپ ايتتى. ۇيىمداستىرۋشى ەردەن تۇرسىن ۇلى جاستار بۇل جانردى قالاي قابىلدايدى دەپ قوبالجىعانىن جاسىرمادى. دەگەنمەن، كورەرمەن ءدان ريزا.
ەردەن تۇرسىن ۇلى، ۇيىمداستىرۋشى:
- نە ءۇشىن ءبىز «جايدارمان» ءازىل كەشىن وتكىزبەيمىز دەگەن ءبىر ويعا كەلدىك تە، جۇمىسىن باستاپ كەتتىك. بۇل بىزگە وتە قيىن بولدى. سەبەبى، وسىنداعى قازاق ستۋدەنتتەرى بۇل ويىنعا قاتىسىپ كورمەگەن.
مەيىر ەرجان، كورەرمەن:
- تاجىريبەلى كوماندالار كەلدى. بىزگە وتە ۇنادى. ويلارى ۇشقىر ەكەن. ويىن مازمۇندارى قوعامعا قاتىستى بولدى. قىتايداعى قازاق جاستارى وسىلايشا ءوزارا ارالاسىپ، ارقا- جارقا بولىپ تارقاستى.
اۆتورلارى: نۇربەك بەكەن، جاڭ ءسۇي
