قازاقستاننىڭ ايگىلى اپورت الماسىن دامىتۋ ماسەلەسى ارنايى باعدارلامادا قامتىلادى

استانا. قازاقپارات - الماتى وبلىسى تالعار اۋدانىندا باق شارۋاشىلىعىن دامىتۋ جانە ونىڭ ىشىندە اپورت سورتىنىڭ كولەمىن ارتتىرۋ تاقىرىبىنا ارنالعان جيىن بولىپ ءوتتى.

«جيىنعا وبلىستىڭ باق وسىرۋگە تابيعي- كليماتتىق جاعدايى قولايلى توعىز اۋدانىنىڭ باق وسىرۋشىلەرى مەن اگرارلىق ماماندارى، عالىمدار قاتىستى. اپورت ءوسىرۋ ءىسىنىڭ كەنجەلەپ قالعانىن ەلباسىنىڭ ءوزى سىنعا العان ەدى. وبلىس اكىمىنىڭ ورىنباسارى تىنىشباي دوسىمبەكوۆ جەتەكشىلىك ەتكەن وسى جيىندا باق شارۋاشىلىعىن وركەندەتۋدەگى كەمشىن تۇستار، وزەكتى پروبلەمالار، ولاردى شەشۋ جولدارى تۋرالى كەڭىنەن تالقىلاندى» ، - دەلىنگەن الماتى وبلىسى اكىمدىگىنىڭ مالىمەتىندە.

جەتىسۋلىقتار الما باقتارىنىڭ اۋقىمىن كەڭەيتۋ ءۇشىن جانە جەمىس بەرەتىن مەرزىمىنەن اسىپ كەتكەن، ەسكىرگەن باقتاردى جاڭارتۋ ءۇشىن بەس جىلدا كەم دەگەندە 4 - 4,5 مىڭ گەكتار باق وتىرعىزۋدى ماقسات ەتۋدە. بيىل رەسپۋبليكالىق بيۋدجەتتەن بۇل ماقساتقا 690,3 ميلليون تەڭگە بولىنگەن.

بۇگىندە وبلىستا ارنايى مارتەبەسى بار 9 شارۋاشىلىق جەمىس اعاشتارى مەن ءجۇزىمنىڭ ەليتالىق كوشەتتەرىن وسىرۋمەن اينالىسادى. ولاردا جىلىنا 1 ميلليون دانادان استام كوشەت ءوسىرىلىپ، تاراتىلادى.

«الداعى ۋاقىتتا عىلىمي- زەرتتەۋ ينستيتۋتتارى الما مەن ءجۇزىمنىڭ پەرسپەكتيۆالىق، اسىرەسە تەحنيكالىق سورتتارىن شىعارۋدى قولعا الا وتىرىپ، باق وسىرەتىن اۋداندارمەن بىرىگىپ ارنايى باعدارلاما ازىرلەمەك. سونىڭ ىشىندە اپورتتى وبلىستا دامىتۋدىڭ دا جايىنا ەرەكشە نازار اۋدارىلاتىن بولادى» ، - دەپ اتاپ وتىلگەن حابارلامادا.

اۆتور: رۋسلان عابباسوۆ