ريم پاپاسى نوبەل سىيلىعىن الۋى مۇمكىن

استانا. قازاقپارات - نوبەلدىك بەيبىتشىلىك سىيلىعىنا ىقتيمال ۇمىتكەرلەردىڭ ءتىزىمى جاريالاندى، دەپ حابارلادى ۋترو. رۋ.

ولاردىڭ اراسىندا ريم پاپاسى فرانتسيسك، ا ق ش ۇلتتىق بارلاۋ اگەنتتىگىنىڭ بۇرىنعى قىزمەتكەرى ەدۆارد سنوۋدەن جانە پاكىستاندىق قۇقىق قورعاۋشى مالالا يۋسۋفزاي بار، دەپ حابارلادى ينتەرفاكس.

وسلوداعى زەرتتەۋ ينستيتۋتىنىڭ ديرەكتورى كريستيان بەرگ حارپۆيكەننىڭ پىكىرىنشە، پونتيفيك وسى ايتىلعان ۇشەۋدىڭ اراسىندا الدا كەلەدى، ويتكەنى ول كەدەيلەردىڭ جاعدايىنا باسا نازار اۋدارۋدا، سونداي- اق ەكونوميكالىق رەسۋرستاردى قايتا ءبولۋ قاجەتتىگىن جاقتايدى.

سنوۋدەن امەريكاندىق ارنايى قىزمەتتەردى اشكەرەلەۋدە اتاعى شىقتى. ول ىقتيمال ۇمىتكەرلەردىڭ اراسىندا ەكىنشى ورىندا تۇر. دەگەنمەن ساراپشىنىڭ اتاپ وتۋىنشە، ونىڭ لاۋرەات بولۋعا ءۇمىتى ۇلكەن ەمەس، ويتكەنى «كوپشىلىگى وسى ۋاقىتقا دەيىن ونى ساتقىن جانە قىلمىسكەر» دەپ ەسەپتەيدى.

نەگىزگى ۇمىتكەرلەر ۇشتىگىن پاكىستاندىق 17 جاستاعى يۋسيفزاي تۇيىقتاۋدا، ول ءوز ەلىندە ايەلدەر قۇقىعىن قورعاۋدا. 2012 - جىلى قۇقىق قورعاۋ قىزمەتىنە بايلانىستى وعان قاسقاندىق تا جاسالدى.

 بيىلعى جىلى نوبەلدىك بەيبىتشىلىك سىيلىعىنا ۇمىتكەرلەر قاتارى رەكوردتىق كورسەتكىشكە - 278 ادام مەن ۇيىمعا جەتتى. نوبەل كوميتەتى لاۋرەاتتى 10 -قازاندا جاريالايدى. سىيلىق 10 -جەلتوقساندا، وسلودا ونىڭ نەگىزىن قالاۋشى شۆەد ونەرتاپقىشى الفرەد نوبەل قايتىس بولعان كۇنى تاپسىرىلادى.