ەلىمىزدەگى ۇزدىك شەنەۋنىكتەردىڭ ەسىمى اتالدى

استانا. قازاقپارات - ەلىمىزدەگى ەڭ ناتيجەلى شەنەۋنىكتەر ءتىزىمى انىقتالدى.

"ساياسات Monitoring" توبى مەن "ستراتەگيا" الەۋمەتتىك جانە ساياسي زەرتتەۋلەر ورتالىعى مينيسترلەر كابينەتىندەگى ەڭبەكقور شەنەۋنىكتەردىڭ ەسىمىن جاريا ەتتى.

بۇل تۋرالى Newtimews.kz سايتىنا سىلتەمە جاساپ NUR. KZ حابارلايدى.

رەيتينگتى دايىنداۋ بارىسىندا ەكى نارسە نەگىزگە الىنعان. ول - ءوز قاراماعىنا العان سالاداعى ناتيجەلى جۇمىستار جانە ەلباسى تاپسىرماسىن ورىنداۋ.

ساراپشىلار قورىتىندىسى بويىنشا، ۇزدىك ون شەنەۋنىكتىڭ كوشىن ەرلان ىدىرىسوۆ باستاپ تۇر. سىرتقى ىستەر ءمينيسترى ۋكرايناداعى جاعدايعا بايلانىستى جانە جاھاندىق تەرروريزم قاۋپى جونىندە تۇشىمدى وي ايتقاندىعىمەن ەرەكشەلەندى.

ودان بولەك، ماماندار ىدىرىسوۆتىڭ ب ۇ ۇ باس اسسامبلەياسىنىڭ 69 ى سەسسياسىندا ەلۋگە جۋىق كەزدەسۋ وتكىزگەنىن، ونىڭ ىشىندە ب ۇ ۇ باسشىسى پان گي مۋن، ا ق ش مەملەكەتتىك حاتشىسى جون كەرريمەن كەزدەسكەنىن دە نازارعا الىپتى. سونداي-اق، ەلباسى ءجيى قابىلداۋىندا بولعان دا ەرلان ىدىرىسوۆ.

ەكىنشى ورىندا - پرەمەر-ءمينيستردىڭ ءبىرىنشى ورىنباسارى باقىتجان ساعىنتايەۆ. ول ەكونوميكالىق بولىككە، اسىرەسە، ەۋرازيالىق ەكونوميكالىق ينتەگراتسياعا قاتىستى ماڭىزدى سۇراقتاردى ۇمىت قالدىرمايدى.

ماماندار ءۇشىنشى ورىنعا ىشكى ىستەر ءمينيسترى قالمۇحانبەت قاسىموۆتى لايىق دەپ تاپتى. قۇقىق قورعاۋ ورگاندارىنداعى شيكىلىك كوپ بولسا دا، قاسىموۆ ۇزدىك شەنەۋنىكتەر ۇشتىگىنە ەنگەن.

مەملەكەتتىك قىزمەت ىستەرى جانە جەمقورلىققا قارسى اگەنتتىك ءتوراعاسى قايرات قوجامجاروۆ پەن ەنەرگەتيكا ۆيتسە- ءمينيسترى ۇزاقباي قارابالين العاشقى وندىقتا.

ەكىنشى وندىق ىشىندە ەلىمىزدىڭ الەۋمەتتىك-ەكونوميكالىق دامۋىنا جاۋاپ بەرەتىن شەنەۋنىكتەر بار. ونىڭ ىشىندە، ۇلتتىق ەكونوميكا جانە ەنەرگەتيكا مينيسترلەرىن كورۋگە بولادى.

ماماندار مادەنيەت جانە سپورت مينيسترلىگىنە كەلگەن ارىستانبەك مۇحامەدي ۇلىن بەلسەندى شەنەۋنىكتەر قاتارىنا جاتقىزىپتى. ول تەاتر، مۇراجايدى دامىتىپ، وتاندىق كينەماتوگرافتاردىڭ ماسەلەلەرىن كوتەرگەن ەدى.

ال ءبىلىم جانە عىلىم ءمينيسترى اسلان ءسارىنجىپوۆ پەن ەكونوميكالىق ينتەگراتسيا ىستەرى جونىندەگى مينيستر جانار ايتجانوۆا جيىرمالىقتىڭ قاتارىندا جوق.