باس سانيتار دارىگەر تۇماۋدان ساقتانۋ ءۇشىن سارىمساقتى كوپ جەۋگە كەڭەس بەردى

استانا. قازاقپارات - بيىل تۇماۋ ەرتە تاراۋى مۇمكىن! ۆيرۋستىڭ قاۋىپتى بولاتىنى سونشالىق، ەلىمىزدىڭ باس سانيتار-دارىگەرى جۇرتتان بۇرىن ەمحاناعا بارىپ، وزىنە ەكپە سالدىردى. جانداربەك بەكشين قىسپەن قاتار ءورشي تۇسەتىن بۇل ىندەتتىڭ الدىن الۋعا تۇرعىندار دا قازىردەن قامدانۋى كەرەك دەپ وتىر.

ويتكەنى جەر بەتىندە ءجاي سۋىق ءتيۋدىڭ سوڭى اسقىنىپ، ولىمگە سوقتىراتىن جاعدايلار جيىلەپ كەتكەن.

- بۇرىن-سوڭدى ەكپە العانسىز با؟

-  ارينە، بىرنەشە جىل بولدى. ەشقانداي مەندە اللەرگيالىق اسقىنۋ بولعان جوق.

جانداربەك بەكشين تۇماۋعا قارسى ەكپە سالدىرماس بۇرىن اق حالاتتىلاردىڭ ءجىتى تەكسەرۋىنەن ءوتتى. 56 جاستاعى شەنەۋنىكتىڭ قان قىسىمى مەن دەنە قىزۋى قالىپتى. سوندىقتان باس سانيتار-دارىگەر ەكپە كابينەتىنە ەش كەدەرگىسىز جولداما الدى.

مەدبيكەلەر بەكشينگە فرانتسيادان الدىرتقان وتە ساپالى ەكپەنى سالىپ بەردى. ەندى باس سانيتار- دارىگەر جارتى ساعات اق حالاتتىلاردىڭ ءجىتى قاداعالاۋىندا بولادى. ال، پرەپارات تەك 14 كۇننەن كەيىن اسەر ەتەدى دە، جىل بويى جۇقپالى ۆيرۋستان ساقتايدى ەكەن. ءدال وسى ادىسپەن ۇلكەن- كىشىگە تۇماۋدىڭ الدىن الۋعا بولدى. ول ءۇشىن ۇكىمەت بيىل بيۋدجەتتىڭ 875 ميلليون تەڭگەسىنە 1 ميلليوننان استام ۆاكتسينا ساتىپ الىپتى.

ەكپە سالدىرۋ جۇكتى ايەلدەرگە، بالالار مەن قاتەرلى سىرقاتقا شالدىققاندارعا تەگىن. قالعان تۇرعىندارعا 2-3 مىڭ تەڭگەدەن ساتىلادى. اق حالاتتىلار تۇماۋعا توتەپ بەرۋگە دايىنبىز دەپ وتىر. ءبىراق وتاندىق دارىگەرلەر بۇدان وزگە دە قاتەرلى، جۇقپالى ۆيرۋستاردىڭ سەيىلمەي تۇرعانىن ايتادى.

جانداربەك بەكشين، مەملەكەتتىك باس سانيتار- دارىگەر:

- كوبىنەسە قاۋىپتى ۆيرۋس ساۋد ارابياسىندا تىركەلىپ جاتىر. 414 جاعداي تىركەلدى، ونىڭ ىشىندە 115 جاعداي ولىممەن اياقتالدى. ساۋد ارابياسىنا، تاياۋ شىعىستان قايتىپ جاتقان وتانداستارىمىز وسىنداي تەكسەرىستەن وتەدى.

سوندىقتان سانيتار-دارىگەرلەر جۋىردا عانا قاجىلىققا اتتانعان وتانداستارىمىزعا دا ەسكەرتۋ جاساپ، بارىنشا ساق بولۋعا كەڭەس بەردىك دەپ وتىر. ءتىپتى جۇقپالى دەرت ءورشىپ تۇرعان ساۋد ارابياسىنا ازىرگە بارماۋعا دا شاقىرعان ەكەن. الايدا قۇلشىلىققا نيەت ەتكەن ازاماتتار قۇلاق اسپاپتى. ەندى ماماندار قاسيەتتى مەككەدەن ورالعان ءار ادامدى اۋەجايدا قاتاڭ تەكسەرىپ كىرگىزبەك.

- ال جانداربەك بەكشين افريكادان باستالىپ، بۇكىل ەۋروپا ەلدەرىن جايلاپ كەلە جاتقان «ەبولا» ۆيرۋسى جايىندا جاق اشپادى. باس سانيتار- دارىگەر داۋاسى تابىلماعان بۇل دەرتتەن قورعانۋعا قاتىستى الداعى ۋاقىتتا ارنايى جيىن وتكىزەتىنىن عانا جەتكىزدى. ەسەسىنە تۇماۋ تۋرالى كوپ ايتقان بەكشين ودان ساقتانۋ ءۇشىن تۇرعىندارعا جىلى كيىنىپ، كوبىرەك سارىمساق پەن پياز جەۋگە كەڭەس بەردى.

ktk