ق. توقايەۆتىڭ ۋكراينا داعدارىسىنا قاتىستى پىكىرى: دانالىق پەن جاۋاپكەرشىلىك ۇستەمدىك ەتۋى ءتيىس
اسكەري- ساياسي ولشەمدەر جونىندەگى كونفەرەنتسيانىڭ ءبىرىنشى سەسسياسىندا وتكەن ۋكراينا داعدارىسىنا قاتىستى وتكىر پىكىر الماسۋلار بارىسىندا ق. توقايەۆ ءدال وسى ماسەلەگە قاتىستى قازاقستان ۇستانىمىن جان- جاقتى تالداپ بەردى. سەنات سپيكەرىنىڭ اتاپ وتۋىنشە، ۋكراينا داعدارىسى تەك بارشا ۋكراين حالقىنىڭ عانا باسىنا تونگەن تراگەديا بولىپ وتىرعان جوق. سونىمەن قاتار ولار جاھاندىق قاۋىپسىزدىككە شىنايى قاتەر ءتوندىرىپ وتىر. ال بۇل جاڭا قىرعي- قاباق سوعىس بەلگىلەرىنىڭ تۋىنداۋىنا تۇرتكى.
ق. توقايەۆتىڭ مالىمدەۋىنشە، ۋكرايناداعى بارلىق اسكەري ءىس- قيمىلدار، ەڭ الدىمەن ە ق ى ۇ- نىڭ كومەگىمەن ۋكراينا مەن رەسەي كوشباسشىلارى اراسىنداعى سۇحباتتاستىققا جول بەرۋى ءتيىس. سەنات ءتوراعاسى ءوز سوزىندە ق ر پرەزيدەنتى نۇرسۇلتان نازاربايەۆتىڭ مينسكىدە جوعارى دەڭگەيدەگى كەزدەسۋ وتكىزۋ تۋرالى باستاما كوتەرگەنىن، وندا رەسەي مەن ۋكراينا پرەزيدەنتتەرى اراسىندا سۇحباتتاستىق تەتىگى ىسكە قوسىلعانىن جانە بايلانىس توپتارى اراسىنداعى كەلىسسوزدەردىڭ قايتا جاندانعانىن باسا ايتتى. ول ە ق ى ۇ- نى سانكتسيالىق تەكە- تىرەستى دوعارۋعا شاقىردى. ويتكەنى، بۇل جايت تەك رەسەيدىڭ عانا ەمەس، سونىمەن بىرگە اتالعان مەملەكەتكە قارسى سانكتسيا ەنگىزگەن باسقا دا مەملەكەتتەردىڭ دە مۇددەسىنە نۇقسان كەلتىرەدى.
ق. توقايەۆ ە ق ى ۇ ۋكرايناداعى بەيبىت حالىققا قارسى جاسالعان اسكەري قىلمىستاردى تەرگەۋمەن اينالىسۋى قاجەتتىگىن اتاپ كورسەتتى. سەبەبى، ادامزات بالاسىنا جاسالعان قىلمىستارعا كىنالىلەر جازاعا تارتىلۋى ءتيىس. سەنات سپيكەرىنىڭ پايىمىنشا، بۇل ە ق ى ۇ الدىندا تۇرعان كىدىرتۋگە بولمايتىن ماڭىزدى مىندەتتەردىڭ ءبىرى جانە ول بارلىق قيىندىقتارعا قاراماستان ورىندالۋى قاجەت. 
