عالىمدار جامان ادەتپەن كۇرەسەتىن بىلەزىك ويلاپ تاپتى

استانا. قازاقپارات - ءبىر توپ جاس امەريكالىق عالىمدار ادامدى تەمەكى شەگۋ نەمەسە تىرناق كەمىرۋ سىندى جامان ادەتتەرمەن كۇرەسۋگە كومەكتەسەتىن جاڭا قۇرال ويلاپ تاپتى.

ءوز-وزىنە بەرگەن سەرتتەن اينىپ قالعان قوجايىنىن بىلەزىك شاعىن كەرنەۋدە توق سوعۋ ارقىلى تاربيەلەپ وتىرماق.

ءالى جاپپاي ساتىلىمعا شىعىپ ۇلگەرمەگەن قۇرالدى ساتىپ الۋعا قازىردىڭ وزىندە كەزەك ءتىزىلدى دەسە بولادى.

اقش ونەرتاپقىشتارى ءوز يەسىن جامان ادەتتەن ارىلتۋ ءۇشىن «قامشى» ءرولىن اتقاراتىن قۇرال ويلاپ تابۋدى ماقسات تۇتقان. بوستوندىق ءبىر توپ جاس عالىم عالامتورعا ءوز جوبالارىن - ءوز-وزىنە بەرگەن ۋادەسىن بۇزعان يەسىن شاعىن كەرنەۋدە توق سوعۋ ارقىلى جونگە سالاتىن بىلەزىكتى تانىستىردى.

 Pavlok دەپ اتالاتىن اقىلدى بىلەزىك ازىرگە ساتىلىمعا شىققان جوق. قازىردە ونىڭ قۇراستىرۋشىلارى ارنايى اشىلعان سايت ارقىلى جوبانى جۇزەگە اسىرۋعا قاجەتتى قاراجاتتى قايىرىمدى جانداردان جيناستىرۋدا. بىرنەشە كۇننىڭ ىشىندە-اق ولار ون مىڭ دوللار كولەمىندە قارجى جيناعان، دەپ حابارلايدى جوبا اۆتورلارىنىڭ سايتى.

بىلەزىكتىڭ جۇمىس ىستەۋ ءپرينتسيپى قاراپايىم. وعان ادام قولىنا از كەرنەۋدە توق جىبەرەتىن قوندىرعى، جارىقتى ديود، شاعىن ۆيبروماتور ورناتىلعان. ونىڭ ءبارى ادامعا زياندى ادەتى تۋرالى ەسكەرتۋ ماقساتىندا پايدالانىلاتىن بولادى. توق سوعۋ مەن ەسكەرتۋ دابىلى دا وسى ماقساتتا قولدانىلماق.

«بۇل ءونىم شىن مانىندە ادامداردى تەمەكى تارتۋ نەمەسە تىرناق كەمىرۋ سىندى جامان ادەتتەرىنەن ارىلتۋعا كومەكتەسەدى دەپ سەنەمىن. بىلەزىكتىڭ ىشىنە ادامعا پايدالى ارەكەتتەردى دە ىرىكتەيتىن ينتەرفەيس ورناتىلماق: ماسەلەن، ۆيبروبەلگى بىلەزىك يەسىنە ترەناجەر زالىنا بارۋ نەمەسە باسقا دا سپورت تۇرىمەن اينالىسۋ تۋرالى ەسىنە سالاتىن بولادى»، - دەيدى avlok كومپانياسىنىڭ نەگىزىن قالاۋشى ءارى باس ديرەكتورى مانيش سەتحي.

BNews.kz