تۇركى دۇنيەسىنە ورتاق ونەر فەستيۆالى سىر بويىندا «قورقىت جانە ۇلى دالا سازى» اتاۋىمەن وتەدى

قىزىلوردا. قازاقپارات - 8-9 - قازان كۇندەرى قىزىلوردا وبلىسى اكىمدىگى حالىقارالىق «تۇركسوي» ۇيىمىمەن بىرلەسىپ، تۇركى تىلدەس حالىقتاردىڭ «قورقىت جانە ۇلى دالا سازى» اتتى ءداستۇرلى مۋزىكالىق ونەر فەستيۆالىن ۇيىمداستىرىپ وتىر.

 تۇركى تىلدەس حالىقتاردىڭ ۇلتتىق مۋزىكالىق ونەرىن دارىپتەي وتىرىپ، ءوزارا مادەني قارىم- قاتىناس پەن بايلانىسىن نىعايتۋدى ماقسات ەتەدى.

 «تۇران جانە تۇركى الەمى» اتتى سىر ەلى قولونەر شەبەرلەرىنىڭ ەتنو- ارحەولوگيالىق كورمەسىنەن باستاۋ الادى. فەستيۆال اياسىندا فولكلورتانۋشى- عالىمداردىڭ، ونەر زەرتتەۋشىلەرى مەن فەستيۆال قوناقتارىنىڭ قاتىسۋىمەن «قورقىت اتا مۇرالارى - تۇركى حالىقتارىنىڭ رۋحاني قازىناسى» اتتى حالىقارالىق عىلىمي- تەوريالىق كونفەرەنتسيامەن جالعاسادى. سونداي- اق، تۇركى تىلدەس ەلدەر مەن قازاقستاندىق ونەرپازداردىڭ قاتىسۋىمەن مەرەكەلىك كونسەرت وتەدى. 

 تۇركى دۇنيەسىنە ورتاق ايتۋلى ونەر مەرەكەسىنە قازاقستان، ازەربايجان، قىرعىزستان، وزبەكستان، تۇركيا، مولدوۆا ەلدەرىنەن، رەسەي فەدەراتسياسىنىڭ تاتارستان، التاي، ياكۋتيا، حاكاسيا، باشقۇرتستان رەسپۋبليكالارىنان 29 ايگىلى عالىمدار، فولكلورتانۋشىلار، ونەر زەرتتەۋشىلەرى جانە 36 ونەرپازدار مەن ونەر ۇجىمدارى قاتىسادى دەپ جوسپارلانۋدا.

  اۆتور: ەلۋباي اۋەزوۆ