مەملەكەتتىك ءتىل ۇلتتىق بانكتە ۇلىقتالدى

استانا. قازاقپارات - الماتىداعى ءا. قاستەيەۆ اتىنداعى مەملەكەتتىك ونەر مۇراجايىندا قازاقستان رەسپۋبليكاسىنىڭ ۇلتتىق بانكىنىڭ ۇيىمداستىرۋىمەن قازاقستان حالقى تىلدەرىنىڭ مەرەكەسىن اتاپ ءوتۋ ماقساتىندا «مەملەكەتتىك ءتىل - ەل بىرلىگىنىڭ نەگىزى» تاقىرىبىندا مەرەكەلىك ءىس-شارا وتكىزىلدى.

ۇلتتىق بانك ءتوراعاسىنىڭ ورىنباسارى عاليەۆا دينا تولەۋبەك قىزىنىڭ قۇتتىقتاۋ سوزىمەن اشىلعان مەرەكەلىك ءىس-شارا ۇلتتىق بانكتىڭ ورتالىق اپپاراتى مەن الماتى قالالىق فيليالى قىزمەتكەرلەرىنىڭ قاتىسۋىمەن ءوتتى.

ءىس-شارا بارىسىندا «تانىستىرۋ» (ءار توپتىڭ وزدەرىن تانىستىرۋى)؛ «ونەرلى ورگە جۇزەر» (توپ مۇشەلەرىنىڭ ءوز ونەرلەرىن كورسەتۋى)؛ «مادەنيەتتانىم» (توپ مۇشەلەرىنىڭ قازاق حالقىنىڭ سالت-داستۇرلەرى مەن ادەت-عۇرىپتارىنان تەاترلاندىرىلعان كورىنىس كورسەتۋى)؛ «سۇحباتتاسۋ» (توپ مۇشەلەرىنىڭ قارجى، بانك سالالارىنا قاتىستى تاقىرىپتار بويىنشا سۇحباتتاسۋى) سياقتى كەزەڭدەردە باق سىناسقان قاتىسۋشى توپتار تاپقىرلىعىن، ءرولدى ويناۋ شەبەرلىكتەرىن، ءتىل بايلىعى مەن ءتىل مادەنيەتىن كورسەتىپ، سۇحباتتاسۋ كەزىندە قازاق تىلىندە ساۋاتتى سۇراق قويۋمەن قاتار ۇتىمدى جاۋاپ بەرە الدى.

اسىرەسە، «نارەستەنى قىرقىنان شىعارۋ»، «تۇساۋكەسەر»، «ءبىز شانشار» سەكىلدى قازاق حالقىنىڭ ءومىر سالتىنا كورىك بەرەتىن داستۇرلەرىنە قاتىستى قويىلعان كورىنىستەر كورەرمەن كوڭىلىنەن شىقتى.

قاتىسۋشىلاردىڭ قابىلەتى مەن شەبەرلىگىن 5 ادامنان تۇراتىن قازىلار القاسى ساراپتاپ، باعالادى. قازىلار القاسىنىڭ باعالاۋ قورىتىندىسى بويىنشا شارا جەڭىمپازدارى انىقتالىپ، قازىلار القاسىنىڭ ءتوراعاسى، ۇلتتىق بانك ۇيىمداستىرۋ جۇمىسى جانە باقىلاۋ دەپارتامەنتى ديرەكتورىنىڭ ورىنباسارى، پروفەسسور شەرۋباي قۇرمانباي ۇلى جەڭىمپازدارعا ءتيىستى دارەجەدەگى ديپلومدار مەن ەستەلىك كادەسىيلارىن تاپسىردى. «مەملەكەتتىك ءتىل - ەل بىرلىگىنىڭ نەگىزى» مەرەكەلىك ءىس-شاراسىنىڭ I دارەجەلى ديپلومىن «كوڭىلدى دوستار» توبى جەڭىپ الدى.

II ورىندى «اتامەكەن» توبى يەلەنسە، III ورىندى «بولاشاق» توبى ەنشىلەدى.

شارا سوڭىندا ۇلتتىق بانك ۇيىمداستىرۋ جۇمىسى جانە باقىلاۋ دەپارتامەنتىنىڭ ديرەكتورى قايرات ايتەكەنوۆ قايرات ۇلتتىق بانك قىزمەتكەرلەرى مەن شاراعا قاتىسۋشى قوناقتاردى تىلدەر مەرەكەسىمەن قۇتتىقتاپ، ولارعا ساتتىلىك تىلەدى.

سونىمەن بىرگە، شارا بارىسىندا ك. بايسەيىتوۆا اتىنداعى رەسپۋبليكالىق مامانداندىرىلعان مۋزىكا مەكتەبىنىڭ ۇلتتىق وركەسترى، قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ وقىتۋشىلارى، ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتتەرى ءوز ونەرلەرىن كورسەتىپ، كورەرمەندەرگە ەرەكشە مەرەكەلىك كوڭىل-كۇي سىيلادى.

گۇلبارشىن سابايەۆا