دانيار ەلەۋسىنوۆ بوكستان ازيا ويىندارىنىڭ التىنىن جەڭىپ الدى

ورال. قازاقپارات - بۇگىن وڭتۇستىك كورەيانىڭ ينچحون قالاسىندا ءوتىپ جاتقان جازعى ازيا ويىندارىندا قازاق بوكسىنىڭ تاريحىندا دانيار ەلەۋسىنوۆ تۇڭعىش رەت ەكى مارتە ازيا ويىندارىنىڭ چەمپيونى اتاندى.

بۇدان ءتورت جىل بۇرىن گۋاڭجوۋ قالاسىندا دانيار جاس بولعانىنا قاراماستان، تۋرنير بارىسىندا وزىنە ەكى- اق مارتە سوققى دارىتىپ، جەڭىمپاز بولعان ەدى.

 بۇل جولى ول ينچحونعا دۇنيە ءجۇزى چەمپيونى، ءوز سالماعىندا (69 ك گ) الەمدىك رەيتينگتىڭ كوشباسشىسى رەتىندە باردى. دانيار ەلەۋسىنوۆ ەل سەنىمىن تاعى دا اقتاپ، ادەمى بوكس ورنەگىن كورسەتە ءبىلدى.

69 كەلى سالماقتا قازاقستاندىق دانيار ەلەۋسىنوۆ فينالدا وزبەكستاندىق يسرايل مادريموۆتى 3:0 (30:27؛ 30:27؛ 30:27) ەسەبىمەن ۇتىپ، ازيا ويىندارىنىڭ ەكى دۇركىن جەڭىمپازى اتاندى.

دانيار باتىس قازاقستاننىڭ قازتالوۆ اۋدانى قايىڭدى اۋىلىندا دۇنيەگە كەلدى. كەيىن اكەسى ماراتتىڭ قول استىندا اعاسى داۋرەن ەكەۋى ورالدا جاتتىقتى. استاناعا اۋىسقانمەن، ەلگە ءجيى كەلىپ تۇراتىن دانياردى باتىس قازاقستاندىقتار ماقتان تۇتادى. ەندى دانيار ەلەۋسىنوۆكە وليمپيادا ويىندارىنىڭ جۇلدەسى عانا جەتپەي تۇر.

اۆتور: ەلجان ەرالى