13:43, 03 - قازان 2014 | GMT +5
قازاقستانداعى «بارساكەلمەس» ەرەكشە قورعالاتىن ايماققا اينالادى
قىزىلوردا. قازاقپارات - «بارساكەلمەس» مەملەكەتتىك تابيعي قورىعىنىڭ قۇرىلعانىنا 75 -جىل تولۋىنا وراي «ارال ءوڭىرى مەن بارساكەلمەس قورىعىنىڭ بيوالۋانتۇرلىلىگىن ساقتاۋ جانە ولاردىڭ تۇراقتى دامۋىنىڭ پەرسپەكتيۆالارى» تاقىرىبىندا عىلىمي-تاجىريبەلىك كونفەرەنسيا ءوتتى. بۇل تۋرالى ارال اۋداندىق اكىمدىگىنىڭ باسپا ءسوز قىزمەتىنەن حابارلادى.
كونفەرەنسيانىڭ اشىلۋ سالتاناتىندا اۋدان اكىمى ابزال مۇحيموۆ الىس-جاقىن شەتەلدەردەن جانە ەلىمىزدىڭ ءار ايماعىنان كەلگەن قاتىسۋشىلاردى قۇتتىقتاپ، قورشاعان ورتا جاناشىرلارىنىڭ جۇمىسىنا ساتتىلىك تىلەدى. ءۇش كۇندىك كونفەرەنتسيا جۇمىسى 3 كەزەڭ بويىنشا جالعاسىن تاپتى.
«بارساكەلمەس» مەملەكەتتىك تابيعي قورىعىنىڭ ديرەكتورى ز. الىمبەتوۆا وبلىس اكىمى قىرىمبەك كوشەربايەۆتىڭ رەسپۋبليكامىزداعى ۇلكەن قورىقتاردىڭ ءبىرى بولىپ سانالاتىن «بارساكەلمەس» قورىعىن ەرەكشە قورعالاتىن ايماققا اينالدىرۋ تۋرالى ۇسىنىستى قولداپ، جوبا قۇجاتتارىن رەتتەۋدى تاپسىرعاندىعىن ەرەكشە قۋانىشپەن جەتكىزدى.
شاراعا كەلگەن قوناقتار كوكارال بوگەتى مەن «بارساكەلمەس» ارالدارىنا بارىپ، قورىقتىڭ تىنىس-تىرشىلىگىمەن تانىستى.
اۆتور: ەلۋباي اۋەزوۆ
