رەسەي ۋكراينا قورعانىس مينيسترىنە ءىس قوزعادى

استانا. قازاقپارات - رەسەيدىڭ فەدەرالدىق تەرگەۋ كوميتەتى ۋكراينانىڭ قورعانىس ءمينيسترى ۆالەريي گەلەتەي مەن ۋكراينا قارۋلى كۇشتەرى باس شتابىنىڭ باستىعى ۆيكتور مۋجەنكوعا قارسى قىلمىستىق ءىس قوزعادى.

 رەسەي بيلىگى ولارعا كىسى ءولىمىن، گەنوسيدتى جانە سوعىستىڭ تىيىم سالىنعان ءتۇرىن ۇيىمداستىردى دەپ ايىپ تاققان.

ءىس قوزعاۋ تۋرالى قاۋلىدا ولاردان بولەك 25- بريگادانىڭ كومانديرى ولەگ ميكاس پەن 93- بريگادا باسشىلىعىنىڭ «ازىرگە اتى- ءجونى اتالماعان» وكىلى دە بار.

قىركۇيەكتىڭ سوڭىندا تەرگەۋ كوميتەتى ۋكراينانىڭ شىعىسىنداعى ورىس ءتىلدى تۇرعىندارعا «گەنوسيد جاسالۋى» جونىندە قىلمىستىق ءىس قوزعاعان. ول كەزدە رەسمي كيەۆ بۇل ايىپتاۋلاردى «بوس ساندىراق جانە ءوزىن- ءوزى جارنامالاۋ» دەپ اتاعان. رەسەي تەرگەۋ كوميتەتىنىڭ رەسمي وكىلى ۆلاديمير ماركين ول كەزدە «گەنوسيدتەن» ءۇش مىڭعا تارتا ادام قۇربان بولدى دەگەن.

ب ۇ ۇ- نىڭ تامىزداعى ەسەبىندە سول كەزگە دەيىن قاقتىعىستاردان ۋكراينادا بارلىعى 2 مىڭ 220 ادام قازا تاپقانى، ونىڭ 700 گە جۋىعى ۋكراين ساربازدارى ەكەنى ايتىلعان.

رەسەي مەن ۋكراينا سوڭعى ايلاردا جوعارى شەندى شەنەۋنىكتەرىنە قارسى بىرنەشە قىلمىستىق ءىس قوزعاعان. ۋكراينا جاعى شىلدەدە رەسەي قورعانىس ءمينيسترى سەرگەي شويگۋدىڭ ۇستىنەن «زاڭدا قاراستىرىلماعان اسكەريلەندىرىلگەن نەمەسە قارۋلى قۇرىلىم قۇردى» دەگەن ايىپپەن ءىس قوزعاعان.

ونىڭ الدىندا رەسەي بيلىگى ۋكراينا ىشكى ىستەر ءمينيسترى ارسەن اۆاكوۆ پەن دنەپروپەتروۆسك وبلىسىنىڭ گۋبەرناتورى يگور كولومويسكيگە «سوعىس جۇرگىزۋدىڭ تىيىم سالىنعان ءادىس- تاسىلدەرىن قولداندى» دەگەن ايىپپەن ءىس قوزعاپ، حالىقارالىق ىزدەۋ جاريالاعان.

«ازاتتىق»