ق ر ۇلتتىق ەكونوميكا مينيسترلىگى قازاقستانداعى باسپانا قۇنىنىڭ جوعارى بولۋى سەبەپتەرىن اتادى
«ەلىمىزدە باسپانا قۇنىنىڭ جوعارى بولۋىنىڭ نەگىزگى سەبەبى وتاندىق قۇرىلىس كومپانيالارىندا وزىندىك جەكە كاپيتالىنىڭ قاجەتتى كولەمدە بولماۋىنا بايلانىستى»، - دەلىنگەن مينيسترلىكتىڭ «قازاقپارات» ح ا ا- نىڭ رەسمي ساۋالىنا بەرگەن جاۋابىندا.
كوپتەگەن قۇرىلىس كومپانيالارى جەكە قارجىلىق جاعدايىن ارى قاراي نىعايتۋ ماقساتىندا تۇرعىن ءۇي قۇرىلىسى ءۇشىن بانكتەر زايمدارىن تارتادى. وسىعان بايلانىستى ولار سالاتىن ۇيلەردىڭ وزىندىك قۇنىنا اتالعان نەسيەلەردىڭ دە تولەمى ەنەدى. ءوز كەزەگىندە بۇل باسپانانىڭ سوڭعى ساۋدالاناتىن قۇنىن ارتتىرادى.
سونىمەن قاتار 2011-2013 - جىلدارى قۇرىلىس قۇنىنىڭ نەگىزگى وسىمىنە ەنەرگيا تيىمدىلىكتى قولدانۋ، جالاقىنىڭ ءوسىمى، قۇرىلىس ماتەريالدارى باعاسىنىڭ ارتۋى، ماشينالار مەن مەحانيزمدەردى پايدالانۋ اسەر ەتتى.
وتاندىق قۇرىلىس كومپانيالارى وزدەرىنىڭ دامۋىنا مۇمكىندىك بەرەتىن، سونداي- اق جوعارى باعا سالدارىنان باسپانا ساتىلىمىنىڭ تومەندەۋىنە اسەر ەتپەيتىندەي كولەمدەگى تۇرعىن ءۇي قۇنىن وزدەرى ايقىندايدى.
مينيسترلىكتەگىلەر كوممەرتسيالىق باسپانا نارىعى وزگە نارىقتار سەكىلدى باسەكەلەستىك ورتادا دامۋى كەرەكتىگىن اتاپ وتۋدە.
اۆتور: رۋسلان عابباسوۆ
