قازاق كينوسىنىڭ مايتالمانى اسانالى اعا نەگە وكپەلى؟

  استانا.قازاقپارات - وڭتۇستىكتە «قازاقستان ۇلتتىق كينوسىنىڭ كۇندەرى» اتتى كينواكتسيا ءوتتى. جيىندا ءاسانالى ءاشىموۆ كۇنگەي ولكەنىڭ ش. ايمانوۆ تويىن وتكىزۋگە دەگەن ەنجارلىعىنا وكپەلى ەكەندىگىن جەتكىزدى.

«قىز جىبەك» كينوفيلمىندە بەكەجاندى، «اتاماننىڭ اقىرىندا» قاسىمحان شادياروۆتى بەينەلەگەن قازاق كينوسىنىڭ مايتالمانى، كينو جانە تەاتر اكتەرى ءارى رەجيسسەر اسانالى ءاشىموۆ شىمكەنتكە ارنايى ءىس- ساپارمەن كەلىپ، اۋەلى شەكاراشىلارمەن، سوسىن كۇنگەيدەگى جورنالشى قاۋىممەن باس قوستى. ق ر مادەنيەت جانە سپورت مينيسترلىگىنىڭ تاپسىرىسى بويىنشا ق ر ۇ ق ك شەكارا قىزمەتىنىڭ قولداۋىمەن ۇيىمداستىرىلعان جيىندا ونەر مايتالمانى «جاۋشى» ، «نان ءدامى» ، «قازاقى وقيعا» ، «ءسىز كىمسىز، كا مىرزا؟ » جانە كوپ سەريالى «بۇلعارلار تۋرالى بايان» فيلمدەرىنىڭ ءتۇسىرىلۋى مەن ونداعى كادر سىرتىنداعى قىزىقتارمەن ءبولىستى.

بۇل ءىس- ساپاردىڭ قازاق كينوسىنىڭ نەگىزىن قالاۋشىلاردىڭ ءبىرى شاكەن ايمانوۆتىڭ 100 جىلدىعى قۇرمەتىنە ارنالعانىن ايتتى. قازاقستاننىڭ حالىق ءارتىسى كينو الەمىنىڭ قىزىعى مەن شىجىعىن باق وكىلدەرىنىڭ الدىندا ايتىپ ءوتتى. اكتەردىڭ ءوزى باسقوسۋعا كەلىسىمەن قولىنا قالام ۇستاعان قاۋىمنان ءبىر وتباسىداي، ەركىن تىلدەسۋدى سۇرادى. مۇنداعى ماقساتى - ءتورتىنشى بيلىك وكىلدەرىنىڭ ءوزى عانا ەمەس، قازاق كينوسى تۋرالى ويىن بۇكپەسىز ءبىلۋ بولسا كەرەك. قازاق كينو سالاسىنىڭ دامۋ دەڭگەيىن تارزىلاي كەلە، رەجيسسەر وسى ءىس- ساپاردى ۇستازى شاكەن ايمانوۆتىڭ قۇرمەتىنە ارنايتىنىن مالىمدەدى. جانە ونىڭ ەرگە بەرگىسىز ەرەكشەلىكتەرىن ايتتى.

 اسانالى ءاشىموۆ، ق ر حالىق ءارتىسى:

 -  ازدى- كوپتى سۇرگەن ومىرىمدە شاكەن ايمانوۆتاي ادامدى كورگەن ەمەسپىن. ءتىپتى، كەزدەستىرگەن جوقپىن. تابيعي تالانتىن ايتپاعاننىڭ وزىندە بارلىق جاعىنان حاباردار بولىپ جۇرەتىن. ءبىراق ەشقانداي گازەتتى نەمەسە كىتاپتى شۇقشيىپ وقىپ وتىرعانىن كورگەن ەمەسپىن. شەتەلدەرگە بارعاندا سول جاقتىڭ ونەر يەلەرىمەن كادىمگىدەي، سول ورتانىڭ بارلىعىنان حاباردار بولىپ اڭگىمەلەسەدى. تاڭ قالاتىنمىن. زامان كوشىنەن ىلگەرى بولىپ جۇرەتىن كوشباسشىلىعى بار ەدى.

سونىمەن قاتار ءاسانالى ءاشىموۆ شاكەن ايمانوۆتىڭ قۇرمەتىنە ەسكەرتكىش قويۋعا دا بولاتىنىن اتاپ ءوتىپ، ەگەر وبلىس باسشىلىعى بۇل ۇسىنىستى قولداسا بارىنشا كومەك بەرۋگە دايىن ەكەنىن، ءتىپتى ەسكەرتكىش ءمۇسىنىن جاسايتىن ماماندى تاۋىپ بەرەتىنىن دە تىلگە تيەك ەتتى. ءارى يۋنەسكو كولەمىندە اتاپ ءوتىلىپ جاتقان ءدۇبىرلى تويدىڭ قازاعى كوپ قازىنالى وڭىردە ءالى دە ءوز دەڭگەيىندە اتاپ وتىلمەي جاتقاندىعىن تۋراسىنان ايتتى.

- رەسپۋبليكانىڭ بارلىق كينوتەاترلارىندا ۇلى رەجيسسەر شاكەن ايمانوۆ فيلمدەرىنىڭ كوشىرمەلەرى بار. وسىنى ەسكەرە وتىرىپ، بارلىق وڭىردە نەگە شاكەن ايمانوۆتىڭ كۇندەرىن وتكىزبەسكە؟ شاكەن ايمانوۆتىڭ 100  جىلدىق مەرەيتويى يۋنەسكو كولەمىندە اتاپ ءوتىلىپ جاتىر. رەسپۋبليكانىڭ باسقا دا وڭىرلەرى قولعا الدى. ال وڭتۇستىك قازاقستان وبلىسى ءۇنسىز قالىپ وتىر. ۇلكەن وكىنىشكە قاراي، وڭتۇستىكتە رۋعا، جۇزگە قاراپ قولداۋ ءۇردىسى ءالى جويىلماپتى. ول پاۆلوداردا دۇنيەگە كەلسە دە قازاقتىڭ بالاسى. ونىڭ ەسىمى تەك قازاقستانعا ەمەس، الىس- جاقىن شەتەلدەرگە تانىمال، - دەدى ابىز اقساقال.

ايتا كەتەرلىگى، «قازاقستان ۇلتتىق كينوسىنىڭ كۇندەرى» قازاقستان كينەماتوگرافياشىلار وداعىنان جانە ش. ايمانوۆ اتىنداعى «قازاقفيلم» كينوستۋدياسىنان قۇرالعان توپ الداعى كۇندەرى ەلىمىزدىڭ بار وڭىرلەرىندە وسىنداي كەزدەسۋ شارالارىن وتكىزۋدى جوسپارلاپ وتىر.

اۆتور: نۇرشات توكەن

«الاش ايناسى»